Həmyerlilərimiz Brazilyada İqlim Fəaliyyəti Həftəsində iştirak edib
Braziliyanın Rio-de-Janeyro şəhərində baş tutan İqlim Fəaliyyəti Həftəsi çərçivəsində beynəlxalq mütəxəssislər iqlim dəyişikliyinin insan sağlamlığına təsirlərini geniş şəkildə müzakirə ediblər.
Crossmedia.az xəbər verir ki, tədbirdə Azərbaycan Britaniya Peşəkarları Assosiasiyası, onun təşkilat komitəsi üzvləri, TƏBİB, Molekulyar Biologiya və Biotexnologiyalar İnstitutu, Türkiyənin Yozgat Bozok Universiteti, Böyük Britaniyanın UCL Kolleci və digər ali təhsil müəssisələrinin nümayəndələri iştirak ediblər.
Tədbirdə Assosiasiyanın təsisçisi və sədri Dr. İlhamə Cəfərli iqlim müzakirələrinə insan perspektivlərinin inteqrasiyasının əhəmiyyətini vurğulayaraq, iqlim dəyişikliyinin genlərə, reproduktiv sağlamlığa, androgen reseptorlarına və endokrin sistemlərə təsirləri barədə çıxış edib, endokrin pozucu maddələrin məhdudlaşdırılması və həssas əhalinin qorunması üçün siyasət təklifləri irəli sürüb.
Daha sonra, professor Atilla Şənaylı su keyfiyyətinin yaxşılaşdırılması, monitorinq sistemlərinin tətbiqi və su ehtiyatlarının bölgələrarası ötürülməsi zərurətini qeyd edib.
Feqan Həsənzadə və Dr. Teymur Mirzəbəyli isə yaşıl xəstəxanaların inkişafı, səhiyyə sektorunun karbon izinin azaldılması və davamlı səhiyyə sistemlərinin qurulmasının vacibliyini vurğulayıblar.
Aygün Bədəlova iqlim dəyişikliyinin beyin sağlamlığına, xüsusən Alzheimer və demensiya riskinə təsirlərinə diqqət çəkib, Mədinə Əmiraslanova isə iqlim dəyişikliyi ilə xərçəng hallarının artması arasındakı əlaqəni, hava çirkliliyi və ekstremal hava hadisələrinin sağlamlıq infrastrukturuna təsirini təqdim edib.
Qeyd edək ki, tədbir, iqlim dəyişikliyinin insan sağlamlığına çoxşaxəli təsirlərinin müzakirəsi və kollektiv həll yollarının axtarışı üçün mühüm platforma olub.
Nəzrin Salmanova
21:25 28.08.2025
Oxunuş sayı: 16441
