907-ci düzəlişin ləğvi Azərbaycanla ABŞ arasında etimadı artıracaq - Partiya sədri
Azərbaycan xarici işlər naziri Ceyhun Bayramov Prezident İlham Əliyevin Vaşinqton səfərinə həsr olunmuş Nazirlər Kabinetinin iclasında çıxışı zamanı bildirib ki, ABŞ Konqresində 907-ci düzəlişin ləğvi iki ölkə arasında əməkdaşlığın yeni mərhələsinin başlanğıcını göstərir.
Azərbaycanla ABŞ arasında münasibətlərdə yeni mərhələnin başlanğıcı kimi qiymətləndirilən 907-ci düzəlişin ləğvi rəsmi Bakının diqqət mərkəzindədir. Belə ki, xarici işlər naziri Ceyhun Bayramov bildirib ki, bu qərar ikitərəfli əməkdaşlığın daha da güclənməsinə xidmət edəcək və qarşıdakı dövrdə yeni layihələr üçün imkanlar yaradacaq.
Nazirin səsləndirdiyi fikirlərlə bağlı Ədalət partiyasının sədri Mütəllim Rəhimli Crossmedia.az-a açıqlama verib.
Partiya sədri, 907-ci düzəlişin qüvvədə olmasının Azərbaycan-ABŞ münasibətlərində inamsızlıq, etibarsızlıq və güvənsizlik yaratdığını bildirib: “907-ci düzəliş əslində ABŞ-nin keçmiş Qarabağ münaqişəsində Ermənistanı dəstəklədiyi və ölkəmizin haqq mübarizəsini müdafiə etmədiyi siyasətinin göstəricisi idi. Bu qərar ədalətsiz idi və onun ləğv edilməsi həmişə gündəmdə olub. Ən maraqlı cəhət budur ki, 907-ci düzəliş qəbul edildikdən sonra prezidentlər demək olar ki, həmişə onun icrasını təxirə salıblar. Bu da onun bir növ formal xarakter daşıdığını göstərir. Ancaq formal da olsa, bu ciddi ayrıseçkilikdir. Təbii ki, 907-ci düzəlişin qüvvədə olması Azərbaycan-ABŞ münasibətlərində inamsızlıq, etibarsızlıq və güvənsizlik yaradır. Bu da iqtisadi və siyasi əlaqələrin inkişafına maneə yaradır. Bütün bunları nəzərə alaraq ABŞ ilkin addım atmalıdır. Bunun üçün kifayət qədər əsaslar var. Belə ki, 907-ci düzəlişin meydana çıxmasına səbəb olan Dağlıq Qarabağ problemi artıq həll edilib. Ona görə də bu düzəlişin qüvvədə qalması başa düşülən deyil".
Müsahibimiz söyləyib ki, 907-ci düzəlişin ləğvi siyasi baxımdan iki ölkə arasında etimadı artıracaq: "İqtisadi baxımdan isə strateji maraqların təmin olunması üçün ciddi əsaslar formalaşdıracaq. ABŞ-nin hazırda buna ehtiyacı var. Çünki yenilənən dünyada hegemon gücünü saxlamaq istəyir. Azərbaycan isə rəsmi Vaşinqtonun qarantiyası altında enerji resurslarının dünya bazarına təhlükəsiz çıxarılmasını təmin edəcək”.
Nicat Rüstəmzadə
17:34 27.08.2025
Oxunuş sayı: 1216
