Kəlbəcərə böyük qayıdış: Azərbaycan Prezidentinin iradəsi və yeni reallıqlar - Deputat
Azərbaycan Prezidenti İlham Əliyevin işğaldan azad edilmiş ərazilərə hər səfəri mühüm hadisələrlə yadda qalır – yeni yolların və infrastruktur obyektlərinin açılışı, yerli sakinlərlə səmimi görüşlər bu səfərlərin əsas məqamlarını təşkil edir. Avqustun 21-də Kəlbəcər şəhərinə ilk köçün baş tutması isə dövlətimizin gücünün, Prezidentin siyasi iradəsinin və aparılan quruculuq işlərinin bariz göstəricisi oldu. Qısa müddətdə Şuşa, Füzuli, Laçın, Xocalı, Zəngilan və digər bölgələrdə də əhalinin doğma yurdlarına qayıdışı işğaldan azad olunmuş ərazilərdə yeni həyatın başlandığını nümayiş etdirir.
Mövzu barədə Crossmedia.az-a açıqlama verən deputat Soltan Məmədov bildirib:
"Tarix dəfələrlə sübut edib ki, hər bir dövlətin təhlükəsizliyinə ən etibarlı zəmanət silahlı qüvvələrin gücü və hazırlığıdır. Azərbaycan Respublikasının Prezidenti cənab İlham Əliyevin Kəlbəcər rayonuna səfəri zamanı söylədiyi kimi, son 80 il ərzində dünyada Azərbaycan qədər tam və mütləq qələbə qazanan ikinci ölkə olmayıb. Buna məhz düzgün müəyyən edilmiş strategiya, yüksək səviyyəli ordu quruculuğu hesabına nail olunub".
Millət vəkili deyib ki, işğaldan azad olunmuş ərazilərdə həyata keçirilən genişmiqyaslı quruculuq işləri Azərbaycan dövlətinin qüdrətini və xalqımızın iradəsini dünyaya nümayiş etdirir: "Keçmiş məcburi köçkünlərin öz doğma torpaqlarına qayıtması tarixi ədalətin bərpası olmaqla yanaşı, ardıcıl və praqmatik siyasətin nəticəsidir. Qarabağ və Şərqi Zəngəzura dövlət büdcəsindən böyük həcmdə vəsait xərclənir. Bütün infrastruktur bərpa edilir, yeni yaşayış binaları, fərdi evlər tikilir. Tarixi mədəniyyət abidələrinin təmir və bərpa olunması istiqamətində mühüm layihələr həyata keçirilir. Bu, xalqımızın öz vətəninə, tarixinə, dəyərlərinə bağlılığının göstəricisi olmaqla bərabər həm də gələcəyə yatırılan investisiyadır. İqtisadiyyatımızın daha da böyüməsinə, yeni iş yerlərinin açılmasına xidmət edir. Eyni zamanda nəinki Azərbaycanın, bütün Cənubi Qafqazın tarixində yeni bir mərhələnin başladığını təsdiqləyir".
S.Məmmədov qeyd edib ki, Azərbaycan 30 il ərzində regionda sülhün və təhlükəsizliyin təmin olunması üçün çoxsaylı təşəbbüslərlə çıxış edib, dünya ictimaiyyətinə, beynəlxalq təşkilatlara çağırışlar ünvanlayıb: "Lakin bütün bunlara laqeyd bir sükutla yanaşılıb. Vətən müharibəsi və antiterror tədbirlərindən sonrakı proseslər bir daha göstərdi ki, müasir dünyada, beynəlxalq münasibətlər sistemində güc amili ədalətin təmin olunmasının ən effektiv alətidir. Azərbaycan öz silahlı qüvvələrinin peşəkarlığı və gücü sayəsində ərazi bütövlüyünü, suverenliyini bərpa etdi. Hərbi əməliyyatlardan sonra baş verən hadisələrin təhlili isə onu təsdiq edir ki, gücdən ağılla, müdrikliklə istifadə etmək son dərəcə vacib məsələdir. Bu baxımdan, Azərbaycan Prezidentinin siyasəti güclü dövlət amili ilə yanaşı, həm də müdrik, praqmatik, düşünülmüş strategiyaya əsaslanır".
Deputat bildirib ki, bir çox regionlarda davam edən münaqişələrin xarakteri müasir dünyada yeni şərtlərin və reallıqların meydana çıxdığını göstərir. "Azərbaycan dövləti məhz bu şərtləri nəzərə alaraq, öz təhlükəsizliyyini təmin edir" - deyən S.Məmmədov fikrini yekunlaşdırıb.
Mehriban Yariyeva
10:00 24.08.2025
Oxunuş sayı: 2642
