Paşinyan: "Ermənistan-İran münasibətləri strateji tərəfdaşlıq səviyyəsinə yüksəlməlidir"
Ermənistanın baş naziri Nikol Paşinyan İran prezidenti Məsud Pezeşkian ilə geniş formatda keçirilən görüşdə iki ölkə arasındakı münasibətlərə dair açıqlamalar verib.
Crossmedia.az xarici mətbuata istinadən xəbər verir ki, Paşinyan bildirib ki, Ermənistan və İran arasında qarşılıqlı etimad artıb və münasibətlərin strateji tərəfdaşlıq səviyyəsinə qaldırılmasının vaxtı çatıb. Onun sözlərinə görə, İrəvanda keçirilən müzakirələrdə regional sülh və kommunikasiya xətlərinin açılması məsələləri ətraflı nəzərdən keçirilib.
Baş nazir Ermənistan tərəfinin Tehranın ölkənin ərazi bütövlüyü və sərhədlərinin toxunulmazlığı ilə bağlı qəti mövqeyini yüksək qiymətləndirdiyini vurğulayıb.
Paşinyan həmçinin qeyd edib ki, kommunikasiya xətlərinin açılması barədə saziş dəmir yolu daşımalarında Ermənistan-İran əməkdaşlığı üçün yeni imkanlar yaradacaq. Onun sözlərinə görə, Ermənistan ərazisindən keçəcək kommunikasiya xətləri ölkənin suverenliyi altında fəaliyyət göstərəcək və onların təhlükəsizliyini yalnız Ermənistan özü təmin edəcək.
Baş nazir əlavə edib ki, İrəvan və Tehran ticarət dövriyyəsini 3 milyard dollara çatdırmağı hədəfləyir. Bu məqsədə çatmaqda İran İslam Respublikası ilə Avrasiya İqtisadi İttifaqı arasında Azad Ticarət Zonası sazişi mühüm rol oynayacaq.
Pərvin Hacıyeva
15:13 19.08.2025
Oxunuş sayı: 6915
