Ukraynanın hava şarları vasitəsilə dron daşıdığı iddia olunur
Hərbi ekspert Yuri Knutov Ukrayna Silahlı Qüvvələrinin Rusiyaya doğru buraxdığı hava şarlarından üç məqsədlə istifadə edə biləcəyini iddia edib.
Crossmedia.az xəbər verir ki, “aif.ru” nəşrinin məlumatına görə, ekspert hava şarlarının pilotsuz uçuş aparatlarının daşınması, onların hədəfə yönəldilməsi və radioelektron kəşfiyyat üçün istifadə oluna biləcəyini bildirib.
Knutovun sözlərinə görə, hava şarlarına “Hornet” tipli dronlar bərkidilə bilər. Onun iddiasına əsasən, bu aparatlarla təxminən 4-5 kilometr yüksəklikdə hərəkət edən şarlar vasitəsilə dronlar müəyyən ərazilərə çatdırılır və daha sonra hücum üçün buraxılır.
Ekspert əlavə edib ki, bəzi hava şarlarına “Starlink” terminalları da quraşdırıla bilər. Onun fikrincə, bu avadanlıq pilotsuz aparatların hədəfə daha dəqiq yönəldilməsinə imkan verir. Hava şarlarının digər mümkün istifadə məqsədi isə radioelektron kəşfiyyatdır.
Knutov Yaroslavl vilayəti üzərində vurulan hava şarlarının Rusiya hava hücumundan müdafiə sistemlərinin yerini müəyyənləşdirən və məlumatları ötürən avadanlıqla təchiz oluna biləcəyini də ehtimal edib. O, Rusiya hərbçilərinin belə aerostatları aşkar edərək məhv etdiyini bildirib.
Qeyd edək ki, oktyabrın 9-da Ukrayna ərazisindən buraxıldığı bildirilən kiçik kəşfiyyat hava şarlarının Yaroslavl vilayətində vurulduğu barədə məlumat yayılıb. Region sakinlərindən şübhəli obyektlər və ya onların qalıqları aşkar etdikdə 112 nömrəsinə müraciət etmələri istənilib.
17:35 10.10.2026
Oxunuş sayı: 73
