Fransanın dənizaşırı ərazilər naziri Yeni Kaledoniyada danışıqlar aparır
Fransanın dənizaşırı ərazilər naziri Manel Valls hazırda Yeni Kaledoniyada səfərdədir.
Crossmedia.az xəbər verir ki, bu barədə Radio France məlumat yayıb.
O, bir sıra görüşlər və danışıqlar keçirəcək. Səfərin məqsədi iyul ayında Bujivalda imzalanmış və adanın statusunu yenidən müəyyənləşdirərək ona geniş səlahiyyətlər vəd edən sazişi müdafiə etməkdir.
Nazirin proqramında ən mühüm məqam FLNKS – Kanak və Sosialist Milli Azadlıq Cəbhəsinin rəhbərləri ilə görüşdür. Qeyd edək ki, təşkilat Yeni Kaledoniyanın müstəqilliyini dəstəkləyir.
Cəmi bir həftə əvvəl FLNKS iyulun 12-də Yeni Kaledoniyanın müxtəlif siyasi qüvvələri ilə əldə edilmiş razılaşmanı imzalamaqdan imtina edib və danışıqlardan geri çəkilib.
“Yeni Kaledoniyaya gedirəm ki, izah edim, dəqiqləşdirim, əlavə edim, lazım gələrsə inandırım,” – deyə Manel Valls jurnalistlərə açıqlamasında bildirib.
Xatırladaq ki, Paris yaxınlığında Bujivalda əldə olunmuş saziş, Fransa nəzarətində olan adanın statusunu illərlə davam edən qarşıdurmalardan sonra dəyişməyi nəzərdə tutur. Razılaşmaya əsasən, xüsusi “kaledon vətəndaşlığı” fransız vətəndaşlığı ilə yanaşı tətbiq ediləcək, həmçinin “Yeni Kaledoniya Dövləti” yaradılacaq. Yeni qurum diplomatiya, ədliyyə və valyuta sahəsində geniş səlahiyyətlərə malik olacaq, lakin müdafiə məsələləri Parisin öhdəsində qalacaq.
Saziş, həmçinin, 2031-ci ildən etibarən Yeni Kaledoniyada ən azı 10 il yaşayan sakinlərin seçkilərdə iştirak hüququnu tanımağı nəzərdə tutur.
Xumar Emilqızı
14:59 19.08.2025
Oxunuş sayı: 800
