Ermənistanla sülhün mümkün olmasını təmin edən yeganə tərəf Azərbaycan dövlətidir -RƏY
Ermənistanın Baş naziri Nikol Paşinyan xalqa müraciətində deyib ki, yalnız Qarabağ məsələsinin həlli Azərbaycanla sülhü mümkün edib.
“Mən demişdim ki, Qarabağ münaqişəsini davam etdirməmək məntiqi ilə Ermənistana rəhbərlik edəcəyəm və xalq bu məntiqlə razılaşmırsa, qoy inqilab etsin. Amma siz inqilab etmədiniz, çünki mənim kimi siz də başa düşdünüz ki, Qarabağ məsələsi həll olunmasa, sülh olmayacaq. Bəzi qüvvələr Qarabağ məsələsindən sadəcə olaraq Ermənistanda öz problemlərinin həlli üçün alət kimi istifadə ediblər”, - o deyib.
Paşinyan həmçinin Azərbaycanın öz suverenliyini bərpa etməsindən sonra Qarabağı könüllü tərk edən ermənilərlə bağlı məsələyə də toxunub.
“Soydaşlarımıza gəlincə, mən dəfələrlə açıq şəkildə bəyan etmişəm: onların mümkün qayıdışı ideyasını real hesab etmirəm. Ümumiyyətlə, bu, Ermənistanla Azərbaycan arasında yaradılmış sülhə yalnız xələl gətirən mövzudur. Onu yenidən gündəmə gətirmək cəhdləri məcburi köçkünlərin özlərinə heç nə verməyəcək, dövlətlər arasında isə gərginlik yaradacaq. Ona görə də qeyd edirəm: bəli, bu, sülh üçün təhlükəli və zərərli mövzudur”, - o deyib.
Paşinyanın sözlərinə görə, bu fikir xətti ilə razılaşmayanların hamısı şüurlu və ya şüursuz olaraq yeni münaqişələrdə maraqlı olan qüvvələrin “xəmirinə su tökürlər”.
“Axı bir çox münaqişələr, o cümlədən Qarabağ münaqişəsi zahirən humanitar, mədəni və ya digər “məsum” məsələlərin müzakirəsi ilə başlayıb. Amma bunun nəyə gətirib çıxardığını yaxşı xatırlayırıq və təəssüf ki, özümüz də bunu yaşadıq”, - o əlavə edib.
Ermənistanın Baş naziri Nikol Paşinyanın “yalnız Qarabağ məsələsinin həlli Azərbaycanla sülhü mümkün etdi” sözləri regionda onilliklər boyu davam edən münaqişənin kökündəki həqiqəti bir daha təsdiqləyir. Azərbaycanın 44 günlük Vətən müharibəsi və 2023-cü ilin sentyabrında keçirilən 23 saatlıq antiterror əməliyyatı nəticəsində ərazi bütövlüyünü və suverenliyini tam bərpa etməsi, nəinki tarixi ədalətsizliyə son qoydu, həm də Cənubi Qafqazda sülh və sabitlik üçün yeni reallıqlar yaratdı. Prezident İlham Əliyevin qətiyyətli rəhbərliyi və Azərbaycan Ordusunun qəhrəmanlığı ilə formalaşan bu reallıqlar, Ermənistanın otuz illik işğalçılıq siyasətinin regionda sülhə əsas maneə olduğunu sübut etdi. Azərbaycanın beynəlxalq hüquqa əsaslanan prinsipial mövqeyi və sülh təşəbbüsləri regionda əməkdaşlıq və sabitlik üçün möhkəm zəmin yaratmış, sülh danışıqlarının real gündəmə çevrilməsinə imkan vermişdir.
Mövzu ilə bağlı Milli Məclisin deputatı Günay Ağamalı Crossmedia.az-a açıqlama verub:
“Ermənistanın Baş nazirinin “yalnız Qarabağ məsələsinin həlli Azərbaycanla sülhü mümkün etdi” fikri bir həqiqəti ortaya qoyur: uzun illər bölgədə sülhə mane olan əsas amil məhz Ermənistanın işğalçılıq siyasəti idi. Qarabağın otuz ilə yaxın müddətdə qanunsuz işğal altında saxlanılması, bir milyondan çox soydaşımızın doğma torpaqlarından didərgin salınması və beynəlxalq hüququn norma və prinsiplərinin kobud şəkildə pozulması bölgədə sülhün təmin edilməsinə ən böyük maneə idi. 44 günlük Vətən müharibəsi nəticəsində Azərbaycan bu tarixi ədalətsizliyə son qoydu, 23 saatlıq antiterror əməliyyatı ilə ərazi bütövlüyünü və suverenliyini tam bərpa etdi. Məhz Cənab Prezident İlham Əliyevin qətiyyəti, müdrik siyasəti və şanlı Ordumuzun qəhrəmanlığı sayəsində regionda yeni reallıqlar formalaşdı. Bu reallıqlar sülhün yeganə təminatçısı oldu".
Parlamentarinin fikrincə, Ermənistanla sülhün mümkün olmasını təmin edən yeganə tərəf Azərbaycan dövlətidir: "Azərbaycan beynəlxalq hüquqa söykənən prinsipləri həyata keçirərək, bölgədə ədaləti bərpa etdi və yalnız bundan sonra real sülh gündəliyini masaya gətirmək mümkün oldu. Azərbaycan bundan sonra da sülhün, sabitliyin və əməkdaşlığın tərəfdarıdır. Ancaq bu sülh qarşılıqlı hörmət və beynəlxalq hüququn prinsipləri əsasında davam edə bilər”.
Ayhan
15:10 19.08.2025
Oxunuş sayı: 1209
