"Azərbaycanın Cənubi Qafqaz siyasəti Trampın nəzərindən qaçmadı" - Parlamentari
Ermənistanın Baş naziri Nikol Paşinyan xalqa müraciətində ABŞ-nin hazırkı Prezidenti Donald Trampın Azərbaycanla münasibətlərin normallaşması prosesində əvəzsiz rol oynadığını bildirib.
“Bu prosesdə ABŞ Prezidenti Donald Trampın və onun administrasiyasının rolunu qiymətləndirməmək olmaz. Məhz buna görə də Azərbaycan Prezidenti ilə birlikdə Trampın Nobel Sülh Mükafatına namizədliyini irəli sürmək qərarına gəldik”, - o bildirib.
Tramp sələflərindən fərqli olaraq, dünya miqyasında münaqişələri həll etməyə və müharibələri dayandırmağa yönəlmiş siyasəti ilə diqqət çəkir. Onun sülhə olan inamı bir sıra qlobal münaqişələrin, o cümlədən Azərbaycan və Ermənistan arasındakı gərginliyin aradan qaldırılmasında mühüm irəliləyişlərə səbəb olub. Vaşinqton razılaşmaları nəticəsində iki ölkə tarixdə heç vaxt olmadığı qədər sülhə yaxındır. Bununla belə, Ermənistanın illər boyu Azərbaycanın sülh təkliflərini rədd edərək danışıqları ləngitdiyi və regionda gərginliyin əsas səbəblərindən biri olduğu danılmazdır. Vaşinqton görüşü Ermənistana göstərdi ki, artıq nə qaçış üçün yer, nə də prosesi uzatmağın mənası qalmayıb. Bu, regionda davamlı sülh və iqtisadi əməkdaşlıq üçün tarixi fürsət yaradıb.
Trampın Cənubi Qafqaz siyasəti barədə Crossmedia.az-a danışan Milli Məclisin deputatı Jalə Əliyeva bildirib ki, 44 Günlük Vətən müharibəsi və şanlı zəfərdən sonra Azərbaycan sülh müqaviləsinin imzalanması üçün davamlı olaraq öz konskruktiv təkliflərini irəli sürüb: "Lakin bilindiyi kimi bu beş il ərzində Ermənistan sülhü imzalamaqdan müxtəlif bəhanələrlə boyun qaçırıb və sülh prosesini uzadıb. Vaşinqtonda sülh müqaviləsinin ilkin formasının paraflanması çox önəmli məsələ idi. Bu müqavilə 5 ildən bəri Azərbaycanın bu istiqamətdə həyata keçirdiyi məqsədyönümlü siyasətin birmənalı olaraq uğuru kimi qiymətləndirilməlidir. Azərbaycanın həyata keçirdiyi bu siyasət, əlbəttə, Trampın da nəzərindən qaçmayıb. Unutmayaq ki, Tramp seçki öncəsi dünyada sülhün yaranması naminə müharibələrə son verilməsi üçün əlindən gələni edəcəyini və bunu fəaliyyətinin əsas istiqaməti kimi müəyyənləşdirəcəyini bəyan etmişdi. Atdığı ilk addımlardan biri də Ermənistan və Azərbaycan arasında bitmiş müharibənin nəticəsi olaraq bölgəyə sülhün gətirilməsi oldu. Düşünürəm ki, daim sülhdən çıxış etmək İlham Əliyevin tək Azərbaycana, regiona yox ümumilikdə dünyaya yanaşmasındakı prinsipdir. Və bu prinsip həm Azərbaycan həm də ABŞ-nin bugünki gündəmində önəmli yerə sahibdir”.
Ayhan
14:04 19.08.2025
Oxunuş sayı: 22659
