Makron: "Tramp Rusiyaya qarşı ikinci dərəcəli sanksiyalar tətbiq etməyə hazırdır"
Fransa prezidenti Emmanuel Makron bildirib ki, Avropa liderləri Vaşinqtonda ABŞ prezidenti Donald Trampa Ukrayna üzrə danışıqların uzadılmaması barədə xəbərdarlıq ediblər. Onun sözlərinə görə, Moskvanın sülh istəklərinə hələ də ciddi şübhələr mövcuddur.
Crossmedia.az-ın məlumatına görə, Makron qeyd edib ki, gələcəkdə Avropa hərbçiləri Ukraynanın təhlükəsizliyini təmin etmək üçün sülhməramlı missiyalarda iştirak etməlidirlər.
"Bizə güclü Ukrayna ordusu lazım olacaq və Ukraynaya yerli qoşunlarla dəstək verməli olacağıq. Sülhməramlı əməliyyatlara ehtiyac olacaq və müttəfiqlər bunu təmin etməyə hazırdırlar”, — deyə Fransa lideri vurğulayıb.
NBC News-a müsahibəsində Makron təhlükəsizlik zəmanətləri olmadan imzalanacaq hər hansı sülh sazişinin uğur qazanmayacağını bildirib.
"Gürcüstan — 2008, Krım — 2014. Tam əminliklə deyə bilərəm ki, əgər təhlükəsizlik zəmanətləri olmadan sülh razılaşması imzalansa, Rusiya heç vaxt öz sözünə hörmət etməyəcək və öhdəliklərini yerinə yetirməyəcək. Buna görə də, Ukraynanın təhlükəsizlik zəmanətləri bizim üçün tamamilə həlledicidir”, — deyə Makron bəyan edib.
Pərvin Hacıyeva
13:23 19.08.2025
Oxunuş sayı: 836
