Ukraynalı snayper 4,3 km məsafədən dünya rekordunu qırdı
Ukraynanın “Pryvyd” (“Ghost”) adlı snayper bölməsi yeni dünya rekorduna imza atıb. Bölmənin snayperi 4 374 yard (təxminən 4,3 km) məsafədən Rusiya hərbçilərini vuraraq, indiyədək qeydə alınmış ən uzaq snayper atışını həyata keçirib.
Crossmedia.az xəbər verir ki, bu barədə Kyiv Post məlumat yayıb. Bildirilir ki, hadisə Ukraynanın Pokrovsk şəhərində baş verib. Snayperlər 14,5 mm-lik patronlarla atəş açan, çəkisi 25 kq-dan (55 funt) çox olan “Alligator” adlı Ukrayna istehsalı snayper tüfəngindən istifadə ediblər. Atış zamanı süni intellekt dəstəyi və pilotsuz uçuş aparatlarının köməyindən yararlanılıb.
Ukraynalı hərbi jurnalist Yuri Butusovun yayımladığı kadrlarda güllənin pəncərədən keçərək içəridə dayanan iki rus əsgərini məhv etdiyi görünür. Məlumatda qeyd olunur ki, bu məsafədən dəqiqliyin təmin edilməsi üçün snayperin bir neçə dəfə atəş açması ehtimal edilir.
Qeyd edək ki, “Pryvyd” bölməsi son bir ildə təxminən 1000 rus hərbçisini zərərsizləşdirib. Bundan əvvəlki rekord isə 2023-cü ilin noyabrında Ukraynanın Xerson bölgəsində qeydə alınmışdı. Həmin vaxt Ukrayna Təhlükəsizlik Xidmətinin 58 yaşlı snayperi 3 800 metr məsafədən “Lord of the Horizon” adlı tüfənglə hədəfi vurmuşdu.
Nihat Tahirov
11:15 19.08.2025
Oxunuş sayı: 5332
