Xarici xəbərlər

Avropanın Rusiyadan tələbi: "Heç bir dövlətin ərazisinə təcavüz edilməsin"

“Həm Ukraynanın, həm də Avropanın həyati təhlükəsizlik maraqlarını qorumaq üçün güclü təhlükəsizlik təminatlarına ehtiyac var”, - bunu Avropa Komissiyasının Prezidenti Ursula Fon der Lyayen bəyan edib. Rusiya-Ukrayna müharibəsindən “gözü qorxan” və özünü növbəti hədəf hesab edən Avropa ilk gündən proseslərdə yaxından iştirak edir. Və Rusiyadan olan tələblərini, istəklərini də Ukrayna vasitəçiliyi ilə qəbul etdirməyə çalışır.

Mövzu ilə bağlı politoloq İlqar Vəlizadə Crossmedia.az-a açıqlama verib: “Məsələ ilə bağlı konkret bir şey demək çətindir. Rusiya Ukraynaya təhlükəsizliklə bağlı müəyyən vədlər verib. Lakin bu real təhlükəsizlik zəmanətidirmi yoxsa sözdənmi ibarətdir görəcəyik. Avropa üçün təhlükəsizlik NATO-nun 5-ci bəndində də qeyd olunub. Rusiyadan əlavə hansı zəmanətlərin istəniləcəyini də demək çətindir. Həm Ukrayna həm də Avropa çalışacaq ki, mümkün razılaşmalardan özlərinə maksimum xeyir götürsünlər. Zəmanətlər ilk əvvəl bir ölkənin hüdudlarını aşmamaqdan ibarət olacaq. Əsas zəmanət isə o ola bilər ki, Rusiya heç bir Avropa üzvü olan dövlətin ərazisinə təcavüz etməyəcək”.