Əraqçı: “Ermənistanın öz ərazisində yol çəkməsinə etiraz edə bilmərik”
İranın xarici işlər naziri Abbas Əraqçi Ermənistanın öz ərazisində yeni yol çəkməsi ilə bağlı açıqlama verib.
Crossmedia.az xəbər verir ki, bu barədə xarici KİV yazıb.
O bildirib ki, beynəlxalq hüquq baxımından başqa bir ölkənin öz ərazisində yol inşa etməsinə etiraz etmək mümkün deyil:
“Biz digər ölkəyə onun öz ərazisində yol çəkməyi qadağan edə bilmərik. Əgər bu yol tamamilə Ermənistanın suverenliyi və yurisdiksiyası altında olacaqsa, beynəlxalq hüquqa görə etiraz haqqımız yoxdur”, – deyə Əraqçi vurğulayıb.
Diplomatın sözlərinə görə, məsələnin iqtisadi tərəfi İrana müəyyən mənfi təsir göstərə bilər: tranzit yolu kimi İranın əhəmiyyəti nisbətən azala bilər. Lakin Əraqçi əlavə edib ki, bu vəziyyətdə əsas məsələ İranın öz yolunu daha cəlbedici etməsidir:
“Bu bizdən asılıdır: biz yolumuzu elə qurmalıyıq ki, daha çox yükdaşımalar məhz buradan keçsin”, – deyə o qeyd edib.
Əraqçi, həmçinin, ABŞ qoşunlarının yeni yol vasitəsilə Ermənistanda yerləşdirilməsi ehtimalından narahat olduqlarını bildirib.
O əlavə edib ki, İran prezidenti Məsud Pezeşkiyanın Ermənistana gözlənilən səfəri zamanı bu mövzu mütləq müzakirə olunacaq:
“Biz narahatlıqlarımızı bir daha dilə gətirəcəyik. Ermənistanlı dostlarımız bu barədə artıq məlumatlıdırlar. İndi məqsədimiz bu məsələlərin həlli üçün etibarlı mexanizm əldə etməkdir. Bu, müzakirələrimizin əsas mövzularından biri olacaq”, – deyə Əraqçi vurğulayıb.
Xumar Emilqızı
15:25 18.08.2025
Oxunuş sayı: 5325
