Rusiya Azərbaycan və digər ölkə vətəndaşları üçün yeni iş məhdudiyyətləri tətbiq edir - TƏCİLİ
Rusiya Federasiyasında 1 sentyabrdan etibarən Yamal-Nenets Muxtar Dairəsində xarici işçilər üçün yeni məhdudiyyətlər qüvvəyə minir. Yeni qaydalar xüsusilə Azərbaycan, Tacikistan və Özbəkistan vətəndaşlarını əhatə edəcək. Məhdudiyyətlər patenti olan işçilərə aiddir və Avrasiya İqtisadi İttifaqı çərçivəsində Ermənistan, Belarus, Qazaxıstan və Qırğızıstan vətəndaşlarına şamil olunmur, çünki bu ölkələrin vətəndaşlarına Rusiyada işləmək üçün patent və ya iş icazəsi tələb olunmur.
Crossmedia.az bildirir ki, bu məhdudiyyətlər həmçinin Rusiya ərazisinə viza olmadan gəlmiş Azərbaycan, Tacikistan, Özbəkistan, Moldova və Ukrayna vətəndaşlarına da şamil olunur. Lakin müvəqqəti və ya daimi yaşayış icazəsi (VNZ) olan şəxslər istisnadır. Yeni qaydalar regionda işçi qüvvəsinin tənzimlənməsi və yerli bazarın qorunması məqsədilə tətbiq edilir və bölgəyə iş üçün gələn miqrantların vəziyyətini əhəmiyyətli dərəcədə dəyişdirə bilər.
Mehriban Yariyeva
14:37 18.08.2025
Oxunuş sayı: 4749
