Xarici xəbərlər

Rusiya 2026-cı ildə miqrant kvotalarını azalda bilər

Rusiya Əmək Nazirliyi 2026-cı ildən ölkədə miqrantların əmək fəaliyyətinə qoyulan kvotaların azaldılması ilə bağlı təkliflər irəli sürüb. Sənəddə əsas diqqət Uzaq Şərq regionuna yönəlib.

Crossmedia.az xəbər verir ki, Amur vilayətində əcnəbilərin kənd təsərrüfatı, yeyinti sənayesi, texnika təmiri, baytarlıq və qiymətli metalların hasilatı sahəsində işləməsi qadağan oluna bilər.

Yəhudi Muxtar Vilayətində miqrantların pərakəndə ticarətdə payı 50%-lə məhdudlaşdırıla, sərnişindaşıma və taksi xidmətində isə tam qadağa tətbiq oluna bilər.

Çukotkada idarəedici şirkətlərdə kvota 25% səviyyəsində müəyyən edilə bilər.

Primoryedə əcnəbilərin idman sahəsində və ev təsərrüfatlarında işləməsinə tam qadağa qoyula bilər.

Bundan əlavə, ölkənin onlarla digər bölgəsində də kvotaların yenidən tənzimlənməsi nəzərdə tutulur.

Ümumilikdə, Əmək Nazirliyi tikinti sahəsində miqrantların payını 80%-dən 50%-ə, meşə təsərrüfatı və ağac emalı sahəsində 50%-dən 40%-ə, ictimai iaşə sahəsində isə 50%-ə endirməyi, həmçinin spirtli içki və siqaret ticarətində miqrantların çalışmasını qadağan etməyi planlaşdırır.