Xarici xəbərlər

Tramp: “Saxta xəbərlər mənim məğlubiyyətim barədə yalan danışır”

ABŞ-nin prezidenti Donald Tramp media ilə bağlı sərt açıqlama verib. O, KİV-i “saxta xəbərlər” yaymaqda günahlandırıb.

Crossmedia.az xarici mətbuata istinadən xəbər verir ki, Tramp bildirib ki, Rusiya prezidenti Vladimir Putinlə ABŞ-da sammitin keçirilməsi barədə xəbərlər yalanla təqdim olunur: “Saxta xəbər yayanlar artıq 3 gündür deyirlər ki, guya mən Putinə ABŞ-da böyük sammit keçirməyə icazə verməklə ‘böyük məğlubiyyətə’ uğramışam. Əslində isə o, görüşü yalnız ABŞ-da yox, harda olur-olsun, keçirmək istəmirdi və saxta xəbər yayanlar bunu yaxşı bilirlər. Bu, əsas fikir ayrılığı idi”.

O, həmçinin demokratların nəzarətində olan mətbuatı Vaşinqton və digər şəhərlərdə cinayətkarlığı təşviq etməkdə ittiham edib: “Onlar hətta ölkə üzrə ‘mavi’ şəhərlərdə cinayətkarlıq istəyirlər. Amma mən buna imkan verməyəcəyəm. Necə ki, son 3 ayda cənub sərhədində qeyri-qanuni immiqrasiya sıfıra enib, şəhərlərimiz də təhlükəsiz olacaq və Vaşinqton nümunə göstərəcək”, — deyə Tramp vurğulayıb.