Rusiya Azərbaycanla Cənubi Qafqazdakı nəqliyyat əlaqələrinin açılmasını müzakirə edəcək
Rusiya Baş nazirinin müavini Aleksey Overçuk bildirib ki, gələn həftə Azərbaycan tərəfi ilə Cənubi Qafqazdakı nəqliyyat əlaqələrinin bloklanmasının aradan qaldırılması məsələləri müzakirə olunacaq. Görüş Rusiyada keçiriləcək.
Crossmedia.az xarici mətbuata istinadən xəbər verir ki, Overçuk qeyd edib ki, Azərbaycan, Ermənistan və Rusiya Baş nazir müavinlərinin səviyyəsində fəaliyyət göstərən üçtərəfli işçi qrupu Rusiya, Azərbaycan və Ermənistan liderlərinin üçtərəfli bəyannaməsinin IX bəndinin icrasına çalışır və bütün detalları müzakirə edib.
Baş nazirin müavini əlavə edib ki, məsələlərin həlli texniki-iqtisadi əsaslandırmalara çevriləcək, layihələrin iqtisadi tərəfi qiymətləndiriləcək və bloklanmanın aradan qaldırılması üçün üçtərəfli səylər davam etdiriləcək.
Pərvin Hacıyeva
13:00 15.08.2025
Oxunuş sayı: 4159
