“Bəyənmirsənsə, Tramp Marşrutundan istifadə et” – İran sərhədçiləri azərbaycanlı sürücülərə
İran gömrük məmurları Naxçıvandan gələn yük maşını sürücülərinin sərhəddən keçməsinə mane olur, onları günlərlə qidasız və susuz halda gözləməyə məcbur edir. Bu hadisə 8 avqustda Azərbaycan və Ermənistan arasında imzalanmış sülh bəyanatından sonra baş verib.
Crossmedia.az xəbər verir ki, Yerel Gündəlik Naxçıvan nəşrinin məlumatına görə, İran rəsmiləri Naxçıvandan Bakıya yük daşıyan sürücülərə açıq şəkildə düşmən münasibəti göstərməyə başlayıblar. Sürücülər bildirirlər ki, onları Biləsuvar gömrük keçid məntəqəsindən uzaqda, səhralıq və əlverişsiz ərazilərdə günlərlə gözləməyə məcbur edirlər. Burada nə sığınacaq, nə yemək, nə içməli su, nə də tualet var. Ən sadə ehtiyaclarını ödəmək üçün sürücülər kilometrlərlə piyada getməli olurlar.
Sürücülərin sözlərinə görə, İran gömrükçüləri səbəblərini açıq şəkildə bildirir və bu gecikmələrin Vaşinqtonda imzalanmış, ABŞ-ın vasitəçiliyi ilə əldə olunmuş sülh sazişinə cavab olduğunu deyirlər. Onların dediyinə görə, sərhədçilər tez-tez “Bəyənmirsənsə, Tramp Marşrutundan istifadə et” ifadəsini işlədirlər.
Razılaşmanın əsas maddələrindən biri, ABŞ-ın nəzarətində olacaq və əsas Azərbaycanı Naxçıvanla birləşdirəcək “Beynəlxalq Sülh və Rifah üçün Tramp Marşrutu” adlı nəqliyyat dəhlizinin yaradılmasını nəzərdə tutur. İran isə bu layihəyə açıq şəkildə qarşı çıxıb.
09:43 15.08.2025
Oxunuş sayı: 8732
