Bölgələrdə qəhvəyi mərmər bağacığının yayılmasına qarşı mübarizə tədbirləri davam etdirilir
Nazirlər Kabinetinin müvafiq Sərəncamı ilə təsdiq edilmiş “Qəhvəyi mərmər bağacığına qarşı bitki mühafizəsinə dair cari ilin Tədbirlər Planı”na əsasən qəhvəyi mərmər bağacığına qarşı mübarizə və müşahidə tədbirləri davam etdirilir.
Crossmedia.az xəbər verir ki, bu barədə Kənd Təsərrüfatı
Nazirliyi yanında Aqrar Xidmətlər Agentliyindən məlumat yayıb.
Məlumata görə agentliyin Bitki Mühafizə və Fumiqasiya Mərkəzinin
mütəxəssisləri tərəfindən cari ilin əvvəlindən respublikanın müxtəlif bölgələrində
karantin zərərverici olan qəhvəyi mərmər bağacığına qarşı mübarizə məqsədilə
monitorinqlər həyata keçirilib, feremon tələlər quraşdırılıb və mübarizə tədbirləri
həyata keçirilib.
Zərərvericiyə qarşı mübarizə tədbirlərinin effektivliyini təmin
etmək məqsədilə il ərzində qışlama yerlərinin monitorinqi aparılıb, 51 rayonda
9 min 140 ədəd feromon tələ quraşdırılıb. Monitorinqlər nəticəsində zərərvericinin
2 min 272 ədəd yetkin fərdi, 61 ədəd nimfası aşkarlanıb. Zərərvericinin yetkin
fərd və nimfaları əsasən şimal-qərb və qərb bölgələrində quraşdırılmış feromon
tələlərdə müşahidə olunub. Sirayətlənmə səviyyəsinin yüksək olduğu 125 ocaqda
(315,7 hektar ərazidə) bütün təhlükəsizlik qaydaları nəzərə alınmaqla kimyəvi
mübarizə tədbirləri həyata keçirilib.
Qeyd edək ki, qəhvəyi mərmər bağacığı son illər, əsasən,
fındıq bağlarının ən təhlükəli karantin zərərvericilərindən hesab olunur. Məhsuldarlığa
ciddi ziyan vura bilən zərərverici inkişafı və yayılması üçün əlverişli şərait
yarandıqda sürətlə çoxalaraq yayılır. Dişi fərdlər hər birində 25-30 ədəd
olmaqla, topa şəklində yarpağın alt səthinə yumurta qoyur. Qəhvəyi mərmər
bağacığı həm yetkin, həm də sürfə mərhələsində qida bitkisinin meyvələri, cavan
budaqları və yarpaqlarının şirəsini sovurmaqla qidalanır. Bunun nəticəsində də
meyvələrdə müxtəlif zərərlər əmələ gəlir - dadı pisləşir, üst səthi kələ-kötür
olur. Zərərverici ilə sirayətlənmə zamanı sitrus meyvələri, xurma və üzümün
meyvələri yetişmədən tökülür. Qəhvəyi mərmər bağacığı qərzəkli bitkilərdə meyvələri
sütül dövründə zədələyir və ləpə inkişafdan qalır.
23:58 13.08.2025
Oxunuş sayı: 6524
