"Fransada əlcəzairli və mərakeşli uşaqların kütləvi istismarı " – UNICEF-dən şok hesabat
BMT-nin Uşaq Fondu (UNICEF) tərəfindən İnsan alverinə qarşı Beynəlxalq Mübarizə Günü münasibətilə dərc olunmuş son hesabatda Fransada uşaqların istismarı ilə bağlı dəhşətli miqyaslar üzə çıxıb. Hesabatda qeyd olunur ki, ən çox zərərçəkənlər arasında əlcəzairli və mərakeşli uşaqlar üstünlük təşkil edir.
Beynəlxalq KİV-lər, o cümlədən Fransanın “Le Figaro” qəzeti tərəfindən dərc olunan bu hesabat, Fransanın miqrasiya siyasətinin qaranlıq tərəflərini açaraq, Fransa hakimiyyətinin uşaqları qorumaqda acizliyini sərt şəkildə tənqid edib.
Məlumatlara görə, Fransada cinayətkar istismarın qurbanlarının üçdə ikisindən çoxu yetkinlik yaşına çatmamış şəxslərdir. Onların 92%-i müşayiətsiz uşaqlardır və əksəriyyəti Əlcəzair və Mərakeşdən gəlir. Dövlətin qoruması altında olması lazım olan bu uşaqlar Fransada təşkilatlanmış cinayət şəbəkələrinin asan hədəfinə çevrilirlər.
Crossmedia.az xarici mətbuata istinadən xəbər verir ki, hesabatda bildirilir ki, yetkinlik yaşına çatmayanları oğurluqdan və narkotik ticarətindən tutmuş fahişəliyə və transsərhəd qaçaqmalçılığa kömək etməyə qədər müxtəlif cinayətlər törətməyə məcbur edirlər. Sənəddə həmçinin Fransanın şimalında uşaqların istismarı ilə bağlı ayrıca hissə də yer alıb. Orada bu uşaqların gizli şəkildə yük maşınlarında daşındığı vurğulanır. Cinayətkarlar hiyləgər üsullardan istifadə edir, onlara pulsuz səyahət vəd edir və ya borca salaraq asılı vəziyyətə gətirirlər. Bundan başqa, uşaqları narkotikdən asılı hala salmaqla onların psixoloji və fiziki nəzarətini ələ alırlar.
Məsələ yalnız yerli istismarla bitmir – bu uşaqlar Fransanın məhkəmə zallarında da qurban deyil, cinayətkar kimi mühakimə olunurlar.
UNICEF bu siyasəti kəskin qınayaraq vurğulayıb ki, Fransa məhkəmə sistemi insan alverinin qurbanı olan uşaqları qoruyan beynəlxalq hüququ tətbiq etmək əvəzinə, onların sürətli şəkildə cinayət məsuliyyətinə cəlb olunmasına üstünlük verir. Bu isə həqiqi cinayətkarların cəzasız qalmasına imkan yaradır.
Vəziyyətin faciəviliyini yerli şahid ifadələri də təsdiqləyir. Məsələn, Marseldə üzə çıxan bir hadisədə uşaqlar “gündəlik normanı” yerinə yetirmədikləri təqdirdə saxlanılır, döyülür və zorlanırdılar. Bu dəhşətli əməllər Fransanın susqunluğu fonunda baş verir ki, bu da ya birbaşa şəriklik, ya da qəsdən laqeydlik şübhələrini artırır.
UNICEF hesabatında uşaqların maraqlarını hər şeydən üstün tutmağı və qurbanları qorumağa yönəlmiş qanunlar qəbul etməyi tövsiyə edir. Lakin özünü insan haqlarının müdafiəçisi kimi təqdim edən Fransa, xüsusilə də əlcəzairli uşaqlar məsələsində, bu pozuntulara göz yummağa davam edir.
Beləliklə, Paris susqunluğu və laqeydliyi ilə bir daha sübut edir ki, onun humanitar şüarları seçici xarakter daşıyır və əlcəzairli uşaqların həyatı onun üçün ən az əhəmiyyət kəsb edən mövzudur. Çünki onların ədalət məsələsi Fransanın siyasi maraqlarına uyğun gəlmir.
Pərvin Hacıyeva
17:35 12.08.2025
Oxunuş sayı: 7098
