Tramp və Putin Alyaskada Ukrayna müharibəsini müzakirə edəcək
Rusiya prezidenti Vladimir Putin və ABŞ prezidenti Donald Tramp 15 avqustda ABŞ ərazisində – Alyaskada görüşəcəklər. Görüşün bu məkanda keçirilməsinin əsas səbəbi həmin ərazidə Beynəlxalq Cinayət Məhkəməsinin (BCM) yurisdiksiyasının tətbiq olunmamasıdır. Bundan başqa, Alyaska coğrafi baxımdan Rusiyaya yaxın olduğundan, logistika baxımından da uyğun hesab edilib.
Crossmedia.az xarici mətbuata istinadən xəbər verir ki, Trampın sözlərinə görə, görüşün əsas məqsədi Ukraynada davam edən müharibəyə son qoymaqdır. O, atəşkəs əldə etmək üçün “bəzi ərazilərin dəyişdirilməsi” də daxil olmaqla müxtəlif təkliflərin müzakirə olunacağını bildirib.
Putinin müşaviri Yuri Uşakov isə “Bizim nümayəndə heyətimizin sadəcə Berinq boğazından uçub keçməsi tamamilə məntiqli görünür” deyə qeyd edib.
Ukrayna prezidenti Vladimir Zelenski isə bu görüşün Ukraynanın iştirakı olmadan keçirilməsinin “hüquqi və praktiki baxımdan nəticə verməyəcəyini” bildirib. Avropa liderləri də mümkün razılaşmanın Ukraynanın mövqeyini zəiflədə biləcəyindən narahatlıqlarını ifadə ediblər.
Pərvin Hacıyeva
23:04 09.08.2025
Oxunuş sayı: 784
