Latviya Rusiya təbliğatına qarşı mübarizəni gücləndirir
Latviyada Milli Elektron KİV Şurası (NEPLP) Rusiyanın təbliğatını yayan daha on internet saytına girişin bağlanması barədə qərar qəbul edib.
Crossmedia.az xarici mətbuata istinadən xəbər verir ki, şura bəyan edib ki, həmin saytlar Rusiyanın Ukraynaya qarşı apardığı müharibəni əsaslandırır, işğalı təqdir edir və təcavüzkara informasiya dəstəyi verir.
Latviyada bu cür saytların bloklanmasına 2022-ci ildən başlanılıb və hazırda onların ümumi sayı 413-ə çatır.
Şura üzvü İeva Kalderauskanın sözlərinə görə, ən çox bloklama elə ilk ildə baş verib – o zaman 169 sayt bağlanıb. Ötən il isə 137 sayt, cari ildə isə, iyul ayının sonuna qədər 88 resurs bloklanıb.
Şura bu tədbirlərin real nəticə verdiyini hesab edir. Onların qiymətləndirməsinə əsasən, əgər giriş məhdudlaşdırılmasaydı, bu məlumatları hər ay 40 mindən 68 minə qədər insan izləyə bilərdi. Eyni zamanda, bloklanmış saytlara daxilolma cəhdlərinin sayı ayda yarım milyona çatır – çox vaxt eyni istifadəçi bir neçə dəfə cəhd edir.
NEPLP bu saytları müxtəlif kanallar vasitəsilə izləyir – vətəndaşlardan gələn şikayətlər, dövlət qurumlarının siqnalları, eləcə də öz monitorinqi vasitəsilə.
Pəvin Hacıyeva
11:16 04.08.2025
Oxunuş sayı: 5866
