Partiya sədrindən sensasion açıqlama: "Televiziyada reklam olunan həkimlərin bir çoxu..."
Tibbi Ərazi Bölmələri İdarəetmə Birliyinin (TƏBİB) tabeliyində olan tibb müəssisələrinin dərman və tibbi sərfiyyatla təminatı tam şəkildə həyata keçirilsə də, 2023–2024-cü illərdə dəyəri 5 min manat və ondan yüksək olan əməliyyatların 90 faizdən çoxu özəl tibb müəssisələrində icra edilib. Bu fakt bir daha göstərir ki, vətəndaşların özəl klinikalara olan etimadı dövlət xəstəxanalarına olan güvəndən dəfələrlə yüksəkdir. Son illər səhiyyə sistemində aparılan islahatlara və müxtəlif addımlara baxmayaraq, dövlət xəstəxanaları hələ də insanların ehtiyac və gözləntilərinə tam uyğun səviyyəyə çatmayıb. İnsanların özəl müəssisələrə üz tutmasının əsas səbəbləri sırasında bu klinikaların texniki avadanlıq baxımından üstünlüyü və həkim heyətinə olan inam xüsusilə diqqət çəkir. Bu vəziyyət sual doğurur: dövlət xəstəxanalarına ictimai etimad niyə bu qədər zəifdir və bu etimadı necə bərpa etmək olar?
Mövzu ilə bağlı Ağ Partiya sədri Tural Abbaslı Crossmedia.az-a açıqlama verib: “Dünyanın bir çox ölkələrində dövlət müəssisələrinə daha çox inam var nəinki özəl xəstəxanalara. Lakin Azərbaycanda vəziyyət tərsinədir. Çünki sovet dövründən qalan streotiplər var ki, dövlət xəstəxanalarında ancaq yaşlı həkimlərdir və texniki avadanlıqlar yaxşı deyil. Təəssüflə onu da qeyd etməliyik ki, dövlət də, Səhiyyə Nazirliyi də, TƏBİB və digər müvafiq strukturlar da bu steroetipin aradan qaldırılması üçün heç bir addım atmayıb. Düzdür, bəzi müasir tipli dövlət müəssisələri var. Lakin bu da 1, uzağı 2 klinikadır ki, insanlar güvənib gedir. Dövlət xəstəxanalarında tibbi avadanlıqların müasir standartlara cavab verməməsi, peşəkar həkimlərin maaşa görə özəl xəstəxanalara getməsi, insanlara münasibətlərinin soyuq olması insanların dövlət xəstəxanalarına inamını azaldır. Təbii ki, heç kim sağlamlığını riskə atmaq istəmir. Ona görə də insanlar özəl xəstəxanalara üz tuturlar. Halbuki dövlət xəstəxanalarında icbari sığorta var və qiymətlər nisbətən uyğundur. Düşünürəm ki, dövlət bunu aradan qaldırmaq üçün kompleks tədbirlər planı həyata keçirməlidir. Çünki vətəndaşın öz dövlətinin müalicə müəssisələrinə inamsızlığı heç də yaxşı nüanslardan xəbər vermir”.
T.Abbaslı həmçinin bildirib:
“Təbii ki, burada başqa nüanslar da var. Məsələn məmurların, dövlət xadimlərinin, vəzifəli şəxslərin nəinki dövlət xəstəxanalarında, heç Azərbaycanın özəl klinikalarında belə müalicə almamaları və adi xəstəliklərə görə xaricə üz tutması reallığı da var. Həmçinin dövlət xəstəxanalarında icbari sığortadan sonra növbələrin ucu - bucağı yoxdur. Təcili müdaxilələr də mümkün olmur. Amma özəl klinikalarda ödəniş edərək hər cür müayinə oluna bilirsən. Bəzən görürük ki, televiziyada reklam olunan özəl klinakaların həkimlərinin bir çoxunun heç lisenziyası da olmur. Amma insanlar reklamlara inanır. Dövlət isə bu problemlərlə bağlı heç bir addım atmadığı üçün insanlar özəl xəstəxanalara güvənir”.
Ayhan
14:39 31.07.2025
Oxunuş sayı: 1339
