Günvurma təhlükəsi artır: Həkimlər xəbərdarlıq edir
Yay aylarında havaların çox isti keçməsi səbəbindən günvurma halları artır. Son günlərdə bir neçə nəfər bu səbəbdən xəstəxanaya yerləşdirilib. Həkimlər bildirirlər ki, günvurma əsasən günün altında uzun müddət qalan insanlarda baş verir. Ən çox risk altında olanlar yaşlılar, uşaqlar və xroniki xəstəliyi olan şəxslərdir.
Mütəxəssislər vətəndaşlara tövsiyə edir ki, günün ən isti saatlarında (saat 12:00-dan 16:00-a kimi) birbaşa gün şüaları altında qalmasınlar, baş örtüyündən istifadə etsinlər, bol su içsinlər və yüngül geyimlər geyinsinlər.
Mövzu ilə bağlı allerqoloq Şahvələd Məmmədov Crossmedia.az-a açıqlama verib. Ş.Məmmədov günəşlənmək adı ilə uzun müddət günəş şüaları altında qalmağın mənasız olduğunu bildirib: “Yay aylarının əsas problemi günvurmadır. Adətən günvurma yarım saatdan artıq günəş şüaları altında qalan insanlarda baş verir. Təbii ki, günvurma halları yaşlılara, uşaqlara, xroniki xəstəlikləri olan şəxslərə daha ağır təsir edir. Günvurmadan yayınmaq üçün geyimlərə xüsusi diqqət yetirilməlidir. Ağ rəngdə köynəklər, “kepkalar” geyinməyi tövsiyə edirəm.
Günvurma bəzən çox ağır nəticələrə gətirib çıxara bilər. Hətta dənizə gedərkən günəşlənmək adı ilə saatlarla günəş şüaları altında qalmaq da mənasızdır. Son dövrdə tibb alimlərinin araşdırmalarına görə, uzun müddət günəş altında qalan insanlar gələcəkdə dəri xərçənginə səbəb ola bilər. Günvurma hallarından qorunmaq və gün ərzində bol maye qəbul etmək lazımdır”.
Nicat Rüstəmzadə
13:12 30.07.2025
Oxunuş sayı: 1137
