Kamboca-Tayland sərhədində atəşkəs pozulub: Görüş iki dəfə təxirə salınıb
Kamboca ilə Tayland arasında gərginlik artmaqda davam edir. Sərhəd xəttində yerləşən bir neçə mövqedə qarşılıqlı atışmalar qeydə alınıb.
Crossmedia.az xəbər verir ki, bu barədə Thai PBS telekanalı məlumat yayıb.
Kamboca tərəfi atəşkəs rejimi çərçivəsində çərşənbə axşamı səhər saat 07:00-a təyin edilmiş Tayland və Kamboca hərbi dairə komandirlərinin görüşünü iki dəfə təxirə salıb. İkinci təxirəsalma qeyri-müəyyən müddətə olub.
“Sərhəd xəttində bir çox hissədə qarşılıqlı atışmalar baş verir. Atəşkəsə baxmayaraq, səhər saatlarından etibarən Kamboca tərəfdən atıcı silahlardan atəş açılıb. Tayland qoşunları da adekvat şəkildə cavab verib”, Tayland Quru Qoşunları Komandanlığının açıqlamasında bildirilib.
Komandanlığın əvvəlki bəyanatında isə Kamboca qüvvələrinin gecə yarısından qüvvəyə minmiş atəşkəs rejimini dəfələrlə pozduğu, gecə və səhər saatlarında Tayland mövqelərinə atəş açdığı qeyd olunub.
“Sərhəd boyunca atışmalar davam edir. Kamboca qoşunları Tayland mövqelərinə irəliləməyə cəhd göstərir, lakin Tayland hərbçiləri bu cəhdlərin qarşısını alır”, – komandanlığın rəsmi nümayəndəsi general-mayor Vintxay Suvari deyib.
Hazırda sərhəd boyunca vəziyyətin gərgin olaraq qaldığı bildirilir.
Nigar Rəhimova
09:46 29.07.2025
Oxunuş sayı: 960
