Böyük Britaniya Tayvanla bağlı müttəfiqlərilə birgə döyüşməyə hazır olduğunu bəyan etdi
Hind-Sakit okean regionunda geosiyasi gərginlik getdikcə artır. Xüsusilə Çin və Tayvan arasındakı münasibətlərin kəskinləşməsi beynəlxalq aləmdə narahatlıq doğurur. Belə bir şəraitdə Böyük Britaniyadan regionla bağlı diqqətçəkən bəyanat gəlib.
Crossmedia.az xəbər verir ki, Böyük Britaniyanın müdafiə naziri Con Hili bəyan edib ki, “Əgər Tayvan səbəbilə münaqişə baş verərsə, Böyük Britaniya Sakit okean regionunda öz müttəfiqləri ilə birlikdə döyüşməyə hazırdır”.
Avstraliyanın Darvin şəhərində yerləşən HMS Prince of Wales gəmisində çıxış edən cənab Hili Böyük Britaniyanın, xüsusilə də Avstraliya olmaqla, öz müttəfiqlərinə sadiqliyini vurğulayıb və deyib: “Əgər döyüşmək məcburiyyətində olsaq, Avstraliya və Böyük Britaniya birlikdə döyüşəcək xalqlardır”.
Bu açıqlamalar Hind-Sakit okean regionunda artan gərginlik fonunda səslənib. Böyük Britaniyanın aviadaşıyıcı qruplaşması həmin bölgədə irimiqyaslı hərbi təlimlərdə iştirak edir.
"Böyük Britaniya sülh yolu ilə həlləri üstün tutur, lakin sülhü güc yolu ilə təmin etməyə hazırdır" , - deyə Cənab Hill bildirib.
Bənövşə Zahidli
22:38 28.07.2025
Oxunuş sayı: 7410
