Piylənmənin yeni təsnifatı rəqəmləri azaltsa da sağlamlıq riski qalır
“Plos
Global Public Health” jurnalında dərc olunmuş yeni beynəlxalq tədqiqatın nəticələrinə
görə, piylənmənin necə müəyyənləşdirilməsinə dair təklif olunan dəyişikliklər
problemin qlobal yayılmasına ciddi təsir göstərə bilər.
Crossmedia.az
xəbər verir ki, mövcud standartlarda bədən kütlə indeksi (BKİ) əsas götürülürsə,
yeni yanaşma insanın yalnız çəkisi və boyuna deyil, həm də sağlamlıq vəziyyətinə,
məsələn, diabet, hipertoniya və ya yüksək xolesterin kimi hallara əsaslanır.
ABŞ-ın
Emori və Con Hopkins universitetləri, Avstraliya, Çin və Perudan olan alimlərin
birgə apardığı araşdırmada 56 ölkədən toplanmış 142 min yetkin şəxsin məlumatları
təhlil olunub. Nəticələr göstərib ki, təklif olunan meyarlar tətbiq edildikdə,
piylənmənin yayılmasında bəzi ölkələrdə 50 faizdən çox azalma müşahidə olunur.
Məsələn, Malavidə kişilər arasında 68 faiz, qadınlar arasında isə 53 faiz
azalma qeydə alınıb.
Tədqiqatın
aparıcı müəllifi, Emori Universitetinin professoru Rodrigo Karrillo-Larko
bildirib ki, istifadə olunan təsnifatın təkcə statistikaya deyil, həmçinin
klinik müalicəyə, səhiyyə xərclərinə və insanların sağlamlıq riskləri haqqında
məlumatlılığına da birbaşa təsiri var: “Yeni təsnifat əhalidə piylənmənin
azaldığını göstərə bilər, lakin bu, real azalma deyil, yalnız meyarların dəyişməsidir”,
– deyə Karrillo-Larko vurğulayıb.
Tədqiqatçılar
xəbərdarlıq edirlər ki, yeni təsnifat piylənmənin daha dəqiq müəyyənləşdirilməsinə
imkan verə bilər, lakin bunun geniş şəkildə tətbiqi ciddi bərabərlik və icra
problemləri yarada bilər.
Araşdırma
nəticələri göstərir ki, piylənmənin müəyyənləşdirilməsi yanaşmasındakı istənilən
dəyişiklik yalnız statistik təsirlərlə deyil, həm də səhiyyə sisteminə və
profilaktik fəaliyyətlərə yönələn geniş və düşünülmüş strategiyalarla müşayiət
olunmalıdır.
10:03 28.07.2025
Oxunuş sayı: 9940
