İyunda Toksikologiya şöbəsinə 99 nəfər zəhərlənmə diaqnozu ilə yerləşdirilib – 3 nəfər həyatını itirib
İyun ayı ərzində Kliniki Tibbi Mərkəzin Toksikologiya şöbəsinə ümumilikdə 99 nəfər zəhərlənmə diaqnozu ilə xəstəxanaya yerləşdirilib. Bu barədə Kliniki Tibbi Mərkəzi məlumat verib. Bildirilib ki, zəhərlənmə halları müxtəlif səbəblərdən baş verib. Belə ki, xəstələrdən 37 nəfəri dərman preparatlarından, 27 nəfəri sirkə turşusundan, 1 nəfəri yandırıcı məhluldan, 2 nəfəri spirtli içkidən, 5 nəfəri isə fosfor üzvi birləşmələrdən zəhərlənib. Bundan əlavə, 17 nəfər ilan sancması, 7 nəfər allergik reaksiya, 2 nəfər botulizm və 1 nəfər həşərat dişləməsi səbəbindən Toksikologiya şöbəsinə yerləşdirilib.
Crossmedia.az bildirir ki, həkimlərin səylərinə baxmayaraq, zəhərlənən şəxslərdən 3 nəfərin həyatını xilas etmək mümkün olmayıb. Həlak olanlardan 1 nəfərin qadın, 2 nəfərin isə kişi olduğu qeyd olunur. Ölüm hallarına əsas səbəb kimi sirkə turşusu və dərman preparatları ilə baş vermiş ağır zəhərlənmələr göstərilir. Hazırda mütəxəssislər belə halların qarşısının alınması üçün əhalini zərərli maddələrlə ehtiyatlı davranmağa və bu sahədə maariflənməyə çağırırlar.
10:23 02.07.2025
Oxunuş sayı: 706
