Çimərliyə aparılan qidalar sanitar-gigiyena qaydalarına uyğun hazırlanmalıdır - AÇIQLAMA
Yay mövsümünün başlaması ilə çimərliklər insanların istirahət üçün ən çox üz tutduğu məkanlardan birinə çevrilir. Lakin isti hava şəraiti qida təhlükəsizliyinin daha diqqətlə nəzərə alınmasını tələb edir. Çimərlikdə qidalanma zamanı edilən diqqətsiz seçimlər ciddi sağlamlıq problemlərinə, hətta qida zəhərlənmələrinə səbəb ola bilər.
Araşdırmalar göstərir ki, yay aylarında baş verən qida zəhərlənmələrinin böyük hissəsi məhz çimərliklərdə qeydə alınır.
Bəs çimərliklərdə qida seçimi edərkən nələrə diqqət etmək lazımdır?
Mövzu ilə bağlı Crossmedia.az-a açıqlama verən Qida təhlükəsizliyi Hərəkatının rəhbəri, Sağlam qidalanma mütəxəssisi Məhsəti Hüseynova ilk olaraq bildirib ki, bəzi qidalar daha tez xarab olmağa meyillidir:
“Bunlara xüsusilə zülal tərkibli məhsullar — süd və süd məhsulları, ət və ət məhsulları, eləcə də onlardan hazırlanan digər qidalar aiddir. Xüsusilə də temperatur yüksək olduqda, onların tərkibində mikroorqanizmlər sürətlə çoxalır ki, bu həmin qidaları qəbul etdikdə insan orqanizmində ciddi zəhərlənmələrə gətirib çıxarır. Yüksək temperatur bakteriyaların sürətlə çoxalması üçün əlverişli şərait yaratdığına görə, sağlam, keyfiyyətli, mənşəyi bəlli olan qidalardan hazırlansa belə, bəzən düzgün qablaşdırılmadıqda, günəş şüası altında qaldıqda və eyni zamanda istiliyə məruz qaldıqda, həmin qidaların keyfiyyəti aşağı düşür. Aşağı yaşlı insanlar, yuxarı yaşlı insanlar, xroniki xəstəliyi olan insanlar, eləcə də immun sistemi aşağı olan insanlar arasında bu zəhərlənmələr ciddi fəsadlarla nəticələnir. Buna görə də yaxşı olar ki, həmin qidaları dəniz kənarına aparmasınlar”.
Onun sözlərinə görə, şirniyatlarda da əsas diqqət olunmalı əsas məqam odur ki, süd məhsulu və krem daha çox istifadə olunubsa, bu məhsullar xüsusilə tez xarab olmağa meyillidir:
“Bu qidalardan da uzaq durmaq lazımdır. Yaxşı olar ki, ümumiyyətlə, dənizə, çimərliyə aparılan qidalar hazırlanarkən sanitar-gigiyena qaydalarına uyğun olaraq təmiz, steril şəkildə hazırlansın. Soyuq saxlanılması lazım olan bəzi məhsullar var ki, onların temperaturu dəyişməyən izotermik çantalarda və ya buz paketlərinin köməyi ilə qorunması vacibdir. Tez xarab olmayan qidaların seçilməsi daha uyğundur. Yaxşı olar ki, daha çox yerli və mövsümi meyvə-tərəvəzlərdən, sadə sudan istifadə olunsun. Qurudulmuş meyvələr, qoz, fındıq və çərəzlər aşağı risk qrupuna aid olduqları üçün həmçinin, uzun müddət enerji verdiyinə görə tövsiyə olunur. Eyni zamanda, tərkibində ət olmayan çörək və ya lavaş arası hazırlanmış sendviçlər seçilə bilər. Bu sendviçlərin hazırlanmasında təzə tərəvəzlərdən istifadə edilməsi vacibdir. Bu, həm gün ərzində doyumluluq təmin edir, həm də daha gec xarab olduğu üçün təhlükəsiz seçimdir. Qarışıq yeməklər hazırlamaq əvəzinə, daha çox tək çeşidli qidaları saxlamaq və onları yalnız yeyiləcək zaman qarışdırmaq daha uyğun olar. Əgər paketlənmiş qidalardan istifadə edilirsə, bu zaman onların zədələnməməsinə, istehsalçı şirkətin mənşəyinin məlum olmasına xüsusi diqqət yetirilməlidir. Bəzi hallarda dənizkənarı və nəzarətsiz yerlərdə mənşəyi bəlli olmayan qidalar satılır ki, bunlar sağlamlıq üçün risk yarada bilər. Həmçinin, hər bir paketlənmiş məhsulun üzərində göstərilən saxlanma temperaturuna və açıldıqdan sonra istifadə müddətinə diqqət yetirilməlidir. Əks halda, qaydalara uyğun olmadıqda həmin məhsulun tərkibinin pozulması və sağlamlığa zərər vurması müşahidə oluna bilər”.
Nəzrin Salmanova
12:55 10.06.2025
Oxunuş sayı: 1327
