İmamoğlunun mühafizəçisi və şəxsi katibi həbs edilib
İstanbul Böyükşəhər Bələdiyyəsinə qarşı aparılan əməliyyatların dördüncü dalğasında çərşənbə axşamı səhər saatlarında 25 nəfərin həbsi ilə bağlı qərar çıxarılıb.
Həbs olunanlar arasında Cümhuriyyət Xalq Partiyasının (CHP) prezidentliyə namizədi və vəzifəsindən uzaqlaşdırılan İBB Bələdiyyə Başçısı Əkrəm İmamoğlunun mühafizəçisi Mustafa Akın və şəxsi katibi Kadriye Kasapoğlu da yer alıb.
Crossmedia.az xarici mediaya istinadən bildirir ki, İstanbul Baş Prokurorluğunun apardığı korrupsiya istintaqı çərçivəsində İSTAÇ, KİPTAŞ və Yol İstismar İdarəsindəki pozuntulara dair irəli sürülən iddialar əsasında mayın 23-də əməliyyat həyata keçirilib. Barələrində həbs-qətimkan tədbiri seçilən 49 nəfərin evlərinə səhər saatlarında polis qüvvələri göndərilib. Günün sonunda isə 46 nəfərin saxlanıldığı açıqlanıb.
Mayın 26-da Baş Prokurorluq 36 nəfərin həbsi ilə bağlı qərar verib. Onlar arasında KİPTAŞ-ın baş direktoru Əli Kurt, İBB rəhbər heyətindən Alpay Saltık, Ziya Gökmen Toqay, Yavuz Alpay, eləcə də İmamoğlunun şəxsi komandası üzvləri Mustafa Akın və Kadriye Kasapoğlu da yer alıb. 10 nəfər məhkəmə nəzarəti şərti ilə azadlığa buraxılıb, 25 nəfər barəsində isə həbs-qətimkan tədbiri seçilib.
Qeyd edək ki, Əkrəm İmamoğlu martın 18-də diplomunun ləğvindən bir gün sonra saxlanılıb və martın 23-də korrupsiya ittihamı ilə həbs edilib. CHP-nin prezidentliyə namizədliyinə dair ilkin seçkilər ərəfəsində baş verən bu hadisə Türkiyə ictimaiyyətində geniş rezonans doğurub.
Zəhra Ağayeva
12:16 27.05.2025
Oxunuş sayı: 9343
