Estoniya təhsildə Finlandiyanı geridə qoydu: Siniflərdə telefon istifadəsi təşviq olunur
Avropanın yeni təhsil gücü kimi tanınan Estoniya, beynəlxalq PISA proqramında Finlandiyanı geridə qoyaraq təhsildə Avropanın ən yaxşı nəticə göstərən ölkəsi olub. Estoniyada şagirdlərdən mütəmadi olaraq dərslərdə telefon istifadə etmələri istənilir. Sentyabr ayından etibarən isə hər bir şagirdə şəxsi süni intellekt hesabı təqdim olunacaq.
1,4 milyon əhalisi olan kiçik Baltikyanı ölkə olan Estoniya, 2022-ci ildə keçirilən və nəticələri bir il sonra açıqlanan son PISA qiymətləndirməsində riyaziyyat, təbiət və yaradıcı düşüncə sahələrində Avropa birincisi, oxu sahəsində isə İrlandiyadan sonra ikinci yeri tutub.
Crossmedia.az xəbər verir ki, The Guardian qəzetinin yazdığına görə, Estoniyanın uğurunun bir çox səbəbi olsa da, rəqəmsal texnologiyaları tam şəkildə mənimsəməsi ölkəni digərlərindən fərqləndirir.
Bəzi Avropa ölkələrində telefon istifadəsi qadağan olunarkən, Estoniya müəllimləri şagirdləri telefonlarını öyrənmə vasitəsi kimi istifadə etməyə təşviq edirlər. İndi isə Estoniya “AI Leap” adlı milli təşəbbüslə tələbə və müəllimləri süni intellekt alətləri və bacarıqları ilə təmin etməyi planlaşdırır. Bu təşəbbüs çərçivəsində OpenAI ilə lisenziya danışıqları aparılır və 2027-ci ilə qədər 58 min şagird və 5 min müəllimin yüksək səviyyəli süni intellekt tədris alətlərinə pulsuz çıxışı təmin ediləcək.
Təhsil işçiləri texnologiya üzrə təlim alacaq, özünüinkişaf və rəqəmsal etika ön plana çıxarılacaq. Məqsəd təhsildə bərabərliyi və süni intellekt savadlılığını artırmaqdır. Rəsmilər bu yanaşmanın Estoniyanı yalnız texnologiyaya ən çox doymuş deyil, həm də süni intellekti ən ağıllı şəkildə istifadə edən ölkələrdən birinə çevirəcəyini bildirirlər.
Estoniyanın təhsil və tədqiqat naziri Kristina Kallas Londonda keçirilən Təhsil Dünyası Forumunda çıxışı zamanı bildirib: “Avropa ölkələrinin əksəriyyətinin ekranlara, telefonlara və texnologiyaya qarşı ehtiyatlı və skeptik yanaşdığını bilirik. Estoniya nümunəsində isə cəmiyyət ümumilikdə rəqəmsal alətlərə və xidmətlərə çox daha açıq və uyğundur. Müəllimlər də istisna deyil”.
Nazir əlavə edib ki, Estoniya məktəblərində telefon qadağası yoxdur və əksinə, ağıllı telefonlar ölkənin uğurlu rəqəmsal təhsil siyasətinin bir hissəsi hesab olunur: “Düzünü desəm, bu məsələdə hər hansı bir problem eşitməmişəm. Məktəblər öz səviyyələrində qaydalar müəyyən edir və biz telefonları tədris məqsədilə istifadə edirik”.
Kallas həmçinin qeyd edib ki, oktyabrda keçiriləcək bələdiyyə seçkilərində 16 yaşlı gənclər onlayn şəkildə səs verə biləcək. “Ona görə də biz istəyirik ki, onlar vətəndaşlıq borclarını yerinə yetirmək, seçkilərdə iştirak etmək, məlumat əldə etmək və siyasi platformaları təhlil etmək üçün telefonlarından istifadə etsinlər” , – deyə Kallas vurğulayıb.
Mədinə Cəlilova
03:00 27.05.2025
Oxunuş sayı: 9257
