Səudiyyə Ərəbistanı “spirtli içki qadağası ləğv ediləcək” iddialarını təkzib etdi
Səudiyyə Ərəbistanı rəsmisi ölkədə 1952-ci ildən qüvvədə olan spirtli içki qadağasının ləğv ediləcəyi ilə bağlı yayılan məlumatları təkzib edib.
Crossmedia.az xəbər verir ki, Reuters agentliyinin yaydığı məlumata görə, adının açıqlanmasını istəməyən səudiyyəli rəsmilər, alkoqol qadağasının aradan qaldırılacağı barədə yayılan xəbərlərin həqiqəti əks etdirmədiyini bildiriblər.
Daha əvvəl bəzi yerli və beynəlxalq media orqanlarında Səudiyyə Ərəbistanının 2034 FIFA Dünya Çempionatına ev sahibliyi etməyə hazırlaşdığı səbəbilə nəzarətli şəkildə alkoqol satışına icazə verəcəyi iddia olunmuşdu. Həmin xəbərlərdə 2026-cı ilə qədər ölkədə müəyyən olunmuş 600 turistik bölgədə spirtli içki qadağasının qismən ləğv ediləcəyi, yalnız seçilmiş beşulduzlu otellər, istirahət mərkəzləri və lisenziyalı müəssisələrdə şərab və pivə satışına icazə veriləcəyi qeyd olunurdu. Güclü alkoqollu içkilərin isə qadağan olunmağa davam edəcəyi iddia edilirdi.
Qeyd edək ki, Səudiyyə Ərəbistanında alkoqol tam şəkildə 1952-ci ildə qadağan edilib. Bu qərar, 1951-ci ildə kral Abduləzizin oğlu şahzadə Mişari bin Abduləzizin Ciddədə bir tədbir zamanı sərxoş halda Britaniyanın baş konsul müavinini güllələməsindən sonra qəbul olunmuşdu. Hadisə cəmiyyətdə ciddi narazılıq doğurduğuna görə, kral Abduləziz 1952-ci ildə ölkədə alkoqolun tamamilə qadağan olunması barədə qərar vermişdi.
Mədinə Cəlilova
02:00 27.05.2025
Oxunuş sayı: 11208
