Səmərqənd 2025-ci ildə İslam Dünyasının Mədəniyyət Mərkəzi olacaq
Ümumdünya İslam Təhsili Elm və Mədəniyyət Təşkilatının (ICESCO) baş direktorunun Özbəkistana səfəri çərçivəsində Səmərqənddə beynəlxalq səviyyəli mədəni tədbirlərin keçirilməsi barədə razılıq əldə olunub.
Crossmedia.az xarici mətbuata istinadən xəbər verir ki, mayın 24-də Özbəkistanın xarici işlər naziri Baxtiyor Saidov ICESCO-nun baş direktoru, doktor Səlim bin Məhəmməd əl-Malik ilə görüş keçirib. Görüş zamanı ikitərəfli əməkdaşlığın genişləndirilməsi və birgə layihələrin həyata keçirilməsi məsələləri müzakirə olunub.
Xüsusi olaraq, ICESCO-nun təşəbbüsü ilə Səmərqəndin 2025-ci il üçün İslam Dünyasının Mədəniyyət Paytaxtı elan edilməsi məsələsinə diqqət yetirilib. Qurum rəhbərinin sözlərinə görə, bu status “mədəni əməkdaşlığa yeni təkan verəcək və Özbəkistanın İslam sivilizasiyasındakı aparıcı rolunu vurğulayacaq”.
İl ərzində ICESCO Özbəkistanın müvafiq nazirlik və qurumları ilə birlikdə geniş və zəngin tədbirlər proqramı təşkil edəcək. Mədəniyyət ili çərçivəsində Səmərqənddə “İslam dünyasının mədəni irsi: xətatlıq, poeziya və birlik” mövzusunda beynəlxalq konfrans keçiriləcək. Foruma ICESCO-ya üzv ölkələrin mədəniyyət nazirləri, beynəlxalq təşkilatların və mədəniyyət müəssisələrinin nümayəndələri qatılacaq.
Bundan əlavə, görüş zamanı tərəflər yaxın gələcəkdə əməkdaşlığın dərinləşdirilməsi və perspektivli layihələrin reallaşdırılmasına dair konkret addımların əks olunduğu yol xəritəsini imzalayıblar.
Mədinə Cəlilova
22:29 26.05.2025
Oxunuş sayı: 11318
