ABŞ mediası Türkiyənin milli döyüş təyyarəsini təhlil edib
ABŞ mediası Türkiyənin milli istehsalı olan beşinci nəsil döyüş təyyarəsi KAAN-ın analitik baxışını təqdim edib.
Crossmedia.az xəbər verir ki, analizdə bu layihənin Türkiyənin müdafiə sənayesində xarici asılılığı azaltmaq məqsədi daşıdığı və xüsusilə F-35 proqramından çıxarıldıqdan sonra daha da əhəmiyyət qazandığı qeyd olunur.
Məqalədə bildirilir ki, KAAN süni intellekt və təkmilləşdirilmiş performans göstəriciləri ilə təkcə ABŞ istehsalı döyüş təyyarələrinə rəqib deyil, hətta daha inkişaf etmiş alternativə çevrilə bilər. Analizdə bu inkişafın dünya miqyasında diqqət çəkəcəyi və ciddi təsir yaradacağı vurğulanıb.
Təhlildə Səudiyyə Ərəbistanı, BƏƏ, Pakistan, İndoneziya və Azərbaycanın KAAN layihəsinə maraq göstərdiyi qeyd olunub. “Türkiyə PUA-larının Hindistan-Pakistan münaqişəsi zamanı yaratdığı narahatlıq KAAN-ın gələcəkdə hansı təsirlər yarada biləcəyini göstərir. Pakistanın KAAN alması Hindistan üçün mühüm problem yarada bilər,” – deyə vurğulanıb.
Qeyd olunur ki, müsəlman əhalisi çoxluq təşkil edən ölkələr – Səudiyyə Ərəbistanı, BƏƏ, Pakistan və İndoneziya ABŞ istehsalı silahlarına alternativ olaraq Türkiyənin KAAN təyyarəsinə maraq göstərir. Bu isə ABŞ üçün yalnız bazar payının deyil, həm də bu ölkələrdə təsir imkanlarının azalması deməkdir.
Nigar Yahyazadə
20:59 26.05.2025
Oxunuş sayı: 5688
