Makron Vyetnamla 20 Airbus təyyarəsi üzrə müqavilə imzalayıb
Fransa prezidenti Emmanuel Makron Hanoya son on ildə ilk səfəri çərçivəsində Vyetnamla ticarət əlaqələrinin genişləndirilməsinə yönəlmiş bir sıra sazişlərə imza atıb. Səfərin ən böyük nailiyyəti isə Airbus-un 20 təyyarəlik müqaviləsi olub.
Müqaviləyə əsasən, Avropa istehsalı olan 20 A330neo təyyarəsi Vyetnamın VietJet aviaşirkətinə satılacaq. Bu sövdələşmənin dəyəri təxminən 7 milyard avro (310 milyard türk lirəsi) olaraq qiymətləndirilir.
Crossmedia.az xarici mediaya istinadən bildirir ki, Makron səfər çərçivəsində enerji, peyklər, dəmir yolları və peyvəndlər daxil olmaqla ümumilikdə 5,3 milyard avro (235 milyard türk lirəsi) məbləğində 30-dan çox ticarət və əməkdaşlıq müqaviləsi də imzalayıb. O, bu razılaşmaların Fransa və Vyetnam, həmçinin Avropa İttifaqı ilə ASEAN arasında əlaqələrin yeni mərhələsinə yol açacağını bəyan edib.
Makronun Vyetnama səfəri Fransanın keçmiş müstəmləkəsi ilə münasibətləri gücləndirmək və regionda ABŞ və Çin kimi nəhənglərdən fərqli olaraq “üçüncü yol” təqdim etmək niyyətinin göstəricisidir. Bu səfər ABŞ prezidenti Donald Trampın Aİ mallarına qarşı 50 faizlik gömrük rüsumları tətbiq etməklə hədələdiyi bir dövrə təsadüf edir. ABŞ-ın ticarət təzyiqləri qarşısında Vyetnam Boeing təyyarələri almağı düşünür.
Makronun Cənub-Şərqi Asiyanı əhatə edən diplomatik turu İndoneziya və Sinqapur səfərləri ilə davam edəcək.
Zəhra Ağayeva
18:12 26.05.2025
Oxunuş sayı: 6207
