Müharibənin ağır bədəli: Kremlə 1 milyonluq zərbə
Rusiya Ukraynaya qarşı apardığı müharibədə 1 milyona yaxın canlı qüvvə itirib.
Ukrayna Silahlı Qüvvələrinin Baş Qərargahı bildirir ki, Rusiya 2022-ci ilin fevralında genişmiqyaslı işğala başladığı gündən bəri müharibədə təxminən 1 milyon itki verib. Təkcə son 24 saat ərzində Rusiya ordusu daha 1000 əsgər itirib. Rəqəmlərin içində yalnız həlak olanlar yox, yaralananlar, itkin düşənlər və əsir götürülənlər də nəzərdə tutulur.
Crossmedia.az xarici mediaya istinadən bildirir ki, Ukrayna prezidenti Volodimir Zelenski bu ilin əvvəlində açıqlamışdı ki, 2022-ci ildən bəri 46 min ukraynalı hərbçi həlak olub, 380 minə yaxın əsgər isə yaralanıb. On minlərlə əsgər isə ya itkin düşüb, ya da əsir götürülüb.
Rusiya Müdafiə Nazirliyinin müavini Anna Tsivilyova 2024-cü ilin sonunda açıqlayıb ki, itkin düşən hərbçilərlə bağlı nazirliyə 48 min DNT analizi üçün müraciət daxil olub. Moskva ordusu hər gün 1000-ə yaxın əsgər itirdiyi üçün artıq xarici döyüşçülərdən də istifadə edir.
Şimali Koreya vətəndaşları artıq Rusiya tərəfində döyüşür. 2024-cü ilin sonundan bəri 12 min Şimali Koreya əsgərinin Rusiya ordusuna qoşulduğu təsdiqlənib. Ukrayna həmçinin Çin vətəndaşlarının da döyüş bölgəsində əsir götürüldüyünü bildirib. Pekin isə bu məlumatları inkar edir.
Yeni yay hücumu planı
Rusiya yay aylarında yeni hücum hazırlıqlarını sürətləndirir. Döyüşlər hazırda 1000 kilometr uzunluğundakı cəbhə boyunca, xüsusilə Donetsk vilayətindəki Pokrovsk və Kostyantınivka istiqamətində intensivləşib. Pokrovsk strateji əhəmiyyətə malik logistika mərkəzinə çevrilib.
Ukrayna Baş Qərargahı bildirir ki, Rusiya mayın 9-na – Qələbə Gününə qədər Dnepropetrovsk vilayətinə daxil olmağı planlaşdırırdı, lakin bu məqsədinə çata bilməyib. Eyni zamanda, Rusiya qoşunları Xarkov istiqamətində də yeni hücumlar üçün qüvvələr cəmləşdirir.
Putinin “bufer zona” planı
Prezident Vladimir Putin sərhədyanı bölgələrdə “təhlükəsizlik bufer zonası” yaratmağı planlaşdırır. Bu zona Ukraynanın Sumı, Xarkov və Çerniqov vilayətləri ilə həmsərhəd olan Kursk, Belqorod və Bryansk əyalətlərini əhatə edəcək.
Rusiya Təhlükəsizlik Şurasının sədr müavini Dmitri Medvedev isə daha radikal təkliflə çıxış edib: o, Ukraynanın demək olar ki, bütün ərazisinin bufer zona elan olunmasını istəyir. Qərb Ukraynaya hərbi dəstəyi davam etdirərsə, Medvedev Moskvanın bütün Ukraynanı ələ keçirəcəyini iddia edib.
Zəhra Ağayeva
17:10 26.05.2025
Oxunuş sayı: 1434
