Bild: Çin Pakistana Hindistan təyyarələrinin vurulmasında texnoloji dəstək göstərib
Almaniyanın nüfuzlu Bild nəşri hindistanlı analitiklər qrupunun hazırladığı və redaksiyaya daxil olmuş gizli hesabatı yayımlayıb.
Crossmedia.az xəbər verir ki, Çin mayın 6-dan 7-ə keçən gecə Hindistanın Dassault Rafale, MiG-29 və Su-30 qırıcılarının Pakistana qarşı döyüşlərdə vurulmasında texnoloji və əməliyyat dəstəyi göstərib.
Sənəddə qeyd olunur ki, Çin döyüş zamanı Pakistana qabaqcıl hərbi texnologiyalar və radioelektron müharibə (REB) sahəsində kömək edib. Bu isə Pakistan Hərbi Hava Qüvvələrinə taktiki üstünlük qazandırıb və Hindistan pilotlarının məğlubiyyətinə səbəb olub.
Ekspertlərin fikrincə, Çin bu hadisələrdə "şəbəkə mərkəzli müharibə" doktrinasını sınaqdan keçirib. Bu doktrina Hərbi Hava Qüvvələrinin bütün elementlərinin daim məlumat mübadiləsi aparmasını nəzərdə tutur. Sistemə müasir AESA radarları və PL-15 raketləri ilə təchiz olunmuş Çin istehsalı J-10 qırıcıları, BeiDou peyk naviqasiya sistemi, süni intellektlə idarə olunan radioelektron müharibə qurğuları və uzunməsafəli radiolokasiya aşkarlama təyyarələri daxildir.
Hesabatda qeyd edilir ki, döyüşlər zamanı Hindistan pilotları yerüstü qərargahlarla əlaqə saxlaya bilməyiblər. Çin hava və yer platformalarından istifadə etməklə Hindistanın döyüş zamanı operativ reaksiyasını neytrallaşdırıb.
Ekspertlər Hindistan hökumətinin bu məlumatların gizli saxlanılması cəhdlərini tənqid ediblər.
Nigar Yahyazadə
16:45 26.05.2025
Oxunuş sayı: 8039
