Madriddə İsrailə qarşı beynəlxalq koalisiya təşəbbüsü
İspaniyanın paytaxtı Madriddə dünyanın 20 ölkəsinin nümayəndələrinin iştirakı ilə keçirilən sammitdə iştirakçılar İsraildən Qəzza sektorunda həyata keçirdiyi hərbi əməliyyatları və mülki əhaliyə qarşı zorakılığı dərhal dayandırmağı tələb ediblər.
Crossmedia.az xəbər verir ki, bu barədə ölkənin xarici işlər naziri Xose Manuel Albarez məlumat verib.
Tədbirdə çıxış edən İspaniyanın xarici işlər naziri Xose Manuel Albarez İsrailə qarşı bir sıra sərt tədbirlərin görülməsini təklif edib. Onun sözlərinə görə, İsrailə silah tədarükünə embarqo tətbiq olunmalı və “iki dövlətli həllin qarşısını alan şəxslərə qarşı” hədəfli sanksiyalar qoyulmalıdır.
Nazir həmçinin Avropa İttifaqı ilə İsrail arasında qüvvədə olan Assosiasiya Sazişinin dərhal dayandırılmasını gündəmə gətirib. Bildirilib ki, bu təklif hazırda Brüsseldə müzakirə olunur.
Qeyd edək ki, sammit iştirakçıları İsrailin Qəzzada həyata keçirdiyi hərbi əməliyyatların soyqırım xarakteri daşıdığını bildirərək beynəlxalq ictimaiyyəti daha sərt mövqe tutmağa çağırıblar. İspaniyanın bu təşəbbüsü bölgədə gərginliyin artdığı bir dönəmdə beynəlxalq münasibətlərdə yeni müzakirələrə yol aça bilər.
Nigar Rəhimova
14:50 26.05.2025
Oxunuş sayı: 8479
