Təyyara şirkəti 346 nəfərin öldüyü təyyarə qəzaları ilə bağlı ABŞ-la razılığa gəldi
ABŞ Ədliyyə Nazirliyi, iki ölümcül təyyarə qəzasında 346 nəfərin həyatını itirməsi ilə nəticələnən hadisələrlə bağlı ABŞ mənşəli, dünyanın ən böyük təyyarə istehsalçılarından olan Boeing şirkəti ilə razılıq əldə edib. Bu razılaşma ilə hava nəqliyyatı nəhəngi cinayət təqibindən yayınaraq rəsmi məhkəmədən kənarda məsuliyyətdən azad ola bilər.
Crossmedia.az xarici mediaya istinadən bildirir ki, razılaşmaya əsasən şirkət 1,1 milyard dollardan çox məbləğ ödəməyi və qəzada həlak olanların ailələrinə 445 milyon dollar əlavə kompensasiya verməyi öhdəsinə götürüb. ABŞ tərəfi isə şirkətə qarşı irəli sürülən dələduzluq ittihamını geri çəkib. Nazirlik bu qərarın “praktik və ədalətli nəticə” olduğunu bildirib.
Lakin bu qərar qurbanların ailələri tərəfindən sərt şəkildə tənqid olunub. Onlar ictimai məhkəmənin keçirilməsini, keçmiş şirkət rəhbərlərinin məsuliyyətə cəlb edilməsini və daha ağır maliyyə cəzasının verilməsini tələb edirlər. Davanın vəkillərindən Pol Kassell isə bu cür razılaşmanı “ABŞ tarixində misilsiz və səhv bir qərar” adlandırıb.
Qəzalar 2018-ci ildə İndoneziyada və 2019-cu ildə Efiopiyada baş vermişdi. Hər iki hadisəyə səbəb kimi MCAS adlı proqram təminatı göstərilir. Bu sistem, pilotlara məlumat verilmədən təyyarənin burnunu aşağı salaraq idarəetməni çətinləşdirirdi. Şirkət, bu xüsusiyyət barədə nə Federal Aviasiya Administrasiyasını, nə də pilotları vaxtında məlumatlandırmışdı.
2021-ci ildə şirkət 2,5 milyard dollar cərimə ödəməklə və üç il ərzində şəffaflıq öhdəliklərini yerinə yetirməklə məsuliyyətdən yayınmışdı. Lakin federal prokurorlar bu öhdəliklərin yerinə yetirilmədiyini aşkar etdikdən sonra şirkət yenidən günahını etiraf etməyə və yeni maddi ödənişlərə razı olub.
Fatimə Nəbiyeva
13:00 24.05.2025
Oxunuş sayı: 8930
