Xarici xəbərlər
Zelenski: “Məqsədimiz Rusiyada saxlanılan bütün ukraynalıları vətənə qaytarmaqdır”
Ukrayna və Rusiya arasında Türkiyənin vasitəçiliyi ilə razılaşdırılan ən böyük əsir mübadiləsinin ilk mərhələsi uğurla həyata keçirilib.
Crossmedia.az xəbər verir ki, Ukrayna Prezidenti Volodimir Zelenski bu barədə "İnstagram" hesabında paylaşım edərək, mübadilə nəticəsində 390 nəfərin – hərbçilər və mülki şəxslərin azad edilərək Ukraynaya qaytarıldığını bildirib.
“Bu, Türkiyədə razılaşdırılmış ən böyük mübadilənin ilk mərhələsidir və həmin görüşün ən önəmli nəticəsi kimi dəyərləndirilir. Qalan mərhələlər isə hazırda Rusiya tərəfindən bloklanıb. Əsas məqsədimiz Rusiyada saxlanılan bütün ukraynalıların, istər hərbçi, istərsə də mülki vətəndaşın, azad edilərək vətənə qaytarılmasıdır”,–deyə Zelenski vurğulayıb.
Ukrayna lideri mübadilənin reallaşmasında iştirak edən komanda üzvlərinə, hüquq-mühafizə orqanlarına və xüsusilə mübadilə fondunun formalaşdırılmasında rol alan Ukrayna hərbçilərinə təşəkkür edib.
O əlavə edib ki, bu fondun genişləndirilməsi, o cümlədən rusiyalı təxribatçıların və kollaboratorların daxil edilməsi prosesi davam edir.
Prezidentin sözlərinə görə, mübadilənin növbəti mərhələlərinin yaxın iki gün ərzində həyata keçirilməsi planlaşdırılır.
Bu proses Ukraynanın öz vətəndaşlarının azadlığı uğrunda göstərdiyi ardıcıl səylərin tərkib hissəsi kimi qiymətləndirilir.
Aybəniz Səfərova
21:10 23.05.2025
Oxunuş sayı: 779
