Harvard Universitetinin beynəlxalq tələbə qəbulu dayandırıldı
ABŞ-də Prezident Donald Tramp ilə Harvard Universiteti arasında davam edən gərginlik yeni bir mərhələyə keçib. Tramp administrasiyası Harvard Universitetinin beynəlxalq tələbə qəbul proqramını “müvafiq qanunlara əməl olunmadığı” əsas gətirilərək dayandırıb.
ABŞ-nin Daxili Təhlükəsizlik Naziri Kristi Noem, universitet rəhbərliyinə məktub göndərərək qərarı rəsmi şəkildə bildirdiklərini açıqlayıb.
Crossmedia.az xəbər verir ki, Noem X platformasında paylaşdığı bəyanatda, “Harvard Universitetinin Tələbə və Mübadilə Proqramı sertifikatının dərhal qüvvəyə minmək şərti ilə ləğv edildiyini bildirirəm”, sözlərini işlədib.
Tramp administrasiyası Harvard Universitetini kampusda zorakılığı və antisemitizmi təşviq etməkdə, həmçinin Çin Kommunist Partiyası ilə əlaqəli fəaliyyət göstərməkdə ittiham edib. Nazir Noem, xarici tələbə qəbulunun bir hüquq deyil, ayrıcalıq olduğunu bildirərək, “Harvard dəfələrlə düzgün olanı etmək fürsəti əldə etdi, amma bundan imtina etdi. Qanunlara əməl etmədiklərinə görə Tələbə və Mübadilə Proqramı sertifikatlarını itirdilər”, - deyə əlavə edib.
Federal hökumət daha öncə, Harvard da daxil olmaqla bir sıra universitetləri, xüsusilə Fələstinə dəstək nümayişləri və müxtəliflik, bərabərlik və inklüzivlik proqramlarını əsas gətirərək federal fondların dondurulması ilə hədələmişdi. Bu çərçivədə ədliyyə nazirliyi, səhiyyə və insan xidmətləri nazirliyi, təhsil nazirliyi və Ümumi Xidmətlər İdarəsinin ortaq əməkdaşlığı ilə “Antisemitizmlə Mübarizə üzrə İşçi Qrupu” yaradılmışdı.
Tramp administrasiyası Harvard Universitetinə ayrılmış 2,2 milyard dollarlıq federal fondu və 60 milyon dollarlıq müqavilə vəsaitini dondurmaq qərarı almış, Harvard isə bu qərarın hüquqa zidd olduğunu bildirərək onu dayandırmaq üçün məhkəməyə müraciət etmişdi.
Mədinə Cəlilova
01:20 23.05.2025
Oxunuş sayı: 719
