Fransa İsraili Qəzzada hərbi əməliyyatları dayandırmağa çağırdı
Fransa İsrailin Qəzza zolağındakı hərbi əməliyyatlarını dərhal dayandırmağa və humanitar yardımların bölgəyə maneəsiz şəkildə çatdırılmasına çağırıb.
Crossmedia.az xəbər verir ki, bu barədə Fransa Xarici İşlər Nazirliyinin sözçüsü Kristof Lemoine bəyanatla çıxış edib.
O qeyd edib ki, Qəzzaya yardımın qarşısını almaq beynəlxalq humanitar hüququn kobud şəkildə pozulması deməkdir:
“Humanitar yardım dərhal və heç bir maneə olmadan əhaliyə çatdırılmalıdır. Əks halda, minlərlə körpənin həyatı təhlükə altına düşəcək”.
Sözçü əlavə edib ki, Paris rəsmi Təl-Əvivə təzyiq göstərilməsi üçün Avropa İttifaqının İsraillə mövcud Assosiasiya Sazişini yenidən nəzərdən keçirməsini zəruri hesab edir. Onun sözlərinə görə, bu kontekstdə mümkün sanksiyalar məsələsi də gündəmdədir.
Qeyd edək ki, Fransa son həftələrdə Qəzzada baş verən humanitar fəlakətlə bağlı narahatlığını dəfələrlə dilə gətirərək, beynəlxalq ictimaiyyəti təcili tədbirlər görməyə çağırıb.
Aybəniz Səfərova
21:43 22.05.2025
Oxunuş sayı: 8610
