Almaniya Litvada hərbi birləşmə yerləşdirdi: “NATO torpaqlarını müdafiə etməyə sadiqik”
Almaniya Federativ Respublikasının kansleri Fridrix Mers və müdafiə naziri Boris Pistorius Litvanyaya səfər edərək Almaniyanın bu ölkədə yerləşdirdiyi hərbi briqadanın vəzifəyə başlamasını elan etdilər. Vilnüsdə Litvanya prezidenti Gitanas Nauseda ilə keçirdiyi mətbuat konfransında çıxış edən kansler Mers, Almaniyanın və müttəfiqlərinin NATO torpaqlarını hər cür təhdidə qarşı qorumaqda qərarlı olduğunu bildirdi. “Baltikyanı müttəfiqlərimizin təhlükəsizliyi bizim də təhlükəsizliyimizdir”, – deyə o vurğuladı.
Crossmedia.az xarici KİV-ə istinadən xəbər verir ki, Fridrix Mers həmçinin Avropanın müdafiə qabiliyyətinin gücləndirilməsinin və müdafiə sənayesinin genişləndirilməsinin vacibliyini qeyd etdi. ABŞ ilə ortaq hərəkətə hazır olduqlarını deyən Mers, Ukraynaya dəstəyin maddi səbəblərlə zəifləməyəcəyini bildirdi. Hazırda ABŞ-nin Avropadakı qüvvələrini geri çəkməyə dair heç bir əlamət görmədiklərini də əlavə etdi.
Rusiya-Ukrayna müharibəsindən sonra NATO-nun şərq cinahını gücləndirmək məqsədilə Litvanyaya yerləşdirilən Alman hərbi briqadası bu gündən etibarən rəsmi fəaliyyətə başlayır. Hazırda 500 hərbçi olan briqadanın 2026-cı ilə qədər 2 min, 2027-ci ilin sonuna qədər isə 5 min hərbçiyə çatdırılması planlaşdırılır. Litvanyada xidmət edəcək alman əsgərlərinin ailələri üçün yaşayış və sosial obyektlərin tikintisi də nəzərdə tutulur. Tuqayın aylıq xərclərinin 30 milyon avroya çatacağı bildirilir.
Tuqayın yerləşdirilməsinin ilk addımı 2023-cü ilin dekabrında Litvanya ilə Almaniya arasında imzalanan yol xəritəsi ilə atılmışdı. Bu razılaşmaya əsasən, briqadanın Vilnüs və Kaunas şəhərləri yaxınlığındakı Rdninkai və Rukla bölgələrində daimi olaraq yerləşdirilməsi nəzərdə tutulur.
Almaniya müdafiə naziri Boris Pistorius Litvanyadakı yeni missiyaya dair verdiyi açıqlamada bu briqadanın NATO-ya açıq bir həmrəylik mesajı verdiyini və Almaniyanın alyansın şərq cinahında liderlik məsuliyyətini üzərinə götürdüyünü bildirdi.
Mədinə Cəlilova
01:40 23.05.2025
Oxunuş sayı: 522
