Senat Demokratları Trampın siyasətini müdafiə edən Marko Rubioya sərt çıxış etdilər
ABŞ Dövlət katibi Marko Rubio, Senatın Xarici Əlaqələr Komitəsində keçirilən dinləmədə keçmiş Demokrat həmkarları ilə sərt qarşıdurmaya girib. Tramp administrasiyasının xarici yardım proqramlarını ləğv etməsi və Çin kimi rəqiblərə üstünlük verən siyasətləri səbəbilə Demokrat senatorlar Rubionu tənqid atəşinə tutublar.
Crossmedia.az ABŞ mətbuatına istinadən xəbər verir ki, çıxışlarda səs tonları yüksəlib, senatorlar arasında şəxsi xarakterli söz atışmaları olub və sədrin tokmağı səslənib. Xüsusilə, Demokrat senator Kris Van Hollen Rubionu insan haqları, ictimai sağlamlıq, ərzaq yardımı və demokratiyanı dəstəkləyən proqramlara qarşı böyük kəsintiləri müdafiə etdiyinə görə sərt şəkildə qınayıb. O, Rubionun Dövlət katibi kimi təyin olunmasına verdiyi səsə görə peşman olduğunu açıq şəkildə ifadə edib.
Rubio isə bu tənqidlərə ironiya ilə cavab verib: “Sizin mənə verdiyiniz dəstəyə görə peşman olmağınız, əslində işimi yaxşı gördüyümün sübutudur”. Bu cavab Van Hollen tərəfindən “kobud və acınacaqlı” kimi qiymətləndirilib və gərginliyin artmasına səbəb olub.
Senat yanvar ayında Rubionu 99 səsə qarşı 0 səslə Dövlət katibi vəzifəsinə təsdiq etmişdi. Bir çox Demokratlar onun Tramp administrasiyasında balanslaşdırıcı rol oynayacağına ümid edirdilər.
Nevada senatoru Cekki Rozen isə emosional çıxışı ilə diqqət çəkib. O, Rubionun Trampın ABŞ-ın qlobal liderliyini zəiflədən siyasətlərinə şərik olduğunu bildirərək, “Artıq sizə qəzəbli deyiləm, sadəcə məyusam. Ailənizin yanına qayıdanda özünüzlə fəxr edirsinizmi bilmirəm”, – deyə qeyd edib.
Mədinə Cəlilova
23:15 22.05.2025
Oxunuş sayı: 671
