Uşaqlar yemək yerinə ümid axtarır – Qəzzadan faciəvi statistika
Fələstin Qızıl Aypara Cəmiyyətinin prezidenti Dr. Yunus əl-Xətib Qəzza zolağında vəziyyətin kritik həddə çatdığını bildirib.
Crossmedia.az xəbər verir ki, onun sözlərinə görə, aclıq nəticəsində həyatını itirənlərin sayı 29 nəfərə yüksəlib.
Cenevrədə BMT yanında akkreditə olunmuş jurnalistlərlə görüşdə çıxış edən Dr. Xətib, bölgədə humanitar böhranın dərinləşdiyini vurğulayıb.
O qeyd edib ki, uşaqların 90 faizi aclıqla üz-üzədir və artıq bir çoxu həyatını itirib.
“40 illik təcrübəmdə bu qədər ciddi yardım məhdudiyyəti ilə ilk dəfə qarşılaşıram”, – deyə o bildirib.
Əl-Xətib, İsrailin tətbiq etdiyi məhdudiyyətlərin humanitar yardımların bölgəyə çatmasına ciddi maneə yaratdığını qeyd edib.
O, təcili humanitar dəhlizin açılmasının vacibliyinə diqqət çəkib və beynəlxalq ictimaiyyətin, xüsusilə Böyük Britaniya və Kanadanın, İsrailin yardımları öz nəzarətinə almaq planını rədd etməsinin vacibliyini vurğulayıb.
Dr. Xətib əlavə edib ki, Qəzzaya buraxılan az sayda yardım maşınına baxmayaraq, əksəriyyəti sərhəddə saxlanılır və ehtiyacı olanlara çatmır.
Yardım işçilərinin hücumlar zamanı həlak olması isə onun tərəfindən beynəlxalq hüququn açıq şəkildə pozulması kimi qiymətləndirilib.
Sonda o, Qəzza sakinlərinin psixoloji vəziyyətinin kəskin şəkildə pisləşdiyini deyib:
“Bu insanlar artıq duyğularını itiriblər. Müharibə onların psixologiyasını və gələcəyə dair baxışlarını dərindən zədələyib”.
Aybəniz Səfərova
20:44 22.05.2025
Oxunuş sayı: 9375
