Türkiyədə hakimiyyət və lider dəyişikliyi ehtimalı - Ekspertdən maraqlı açıqlama
Türkiyə Prezidenti Rəcəb Tayyib Ərdoğan Macarıstandan dönərkən jurnalistlərə müsahibəsində prezident seçkilərində yenidən namizədliyə fikrinin olmadığını bildirib.
Qeyd edək ki, Türkiyədə növbəti prezident seçkiləri 2028-ci il mayın 14-dən gec olmayaraq keçirilməlidir.
Bu məsələ barədə Crossmedia.az-a açıqlama verən Ədalət, Hüquq, Demokratiya (ƏHD) Partiyası İdarə Heyətinin üzvü, politoloq Əli Zülfüqaroğlu yeni konstitusiyanın qəbulunun Ərdoğana yenidən prezidentliyə namizəd olmasına imkan verəcəyini bildirib: "Lakin yeni konstitusiyanın qəbulundan sonrakı proseslər Ərdoğanın bu qərarını rəsmiləşdirməsi baxımından əsas şərtdir. Digər tərəfdən, təbii olaraq, alternativ namizədlərin mövcudluğu da istisna deyil. Xüsusilə, daim arxa planda qalan və Milli İstihbarat Təşkilatının rəhbəri kimi mühüm uğurlara imza atmış Hakan Fidanın açıq siyasətə gətirilməsini Ərdoğanın növbəti dövrə hesablanmış strateji addımı kimi qiymətləndirmək olar. İndiyədək Hakan Fidan, Türkiyənin milli kəşfiyyat rəhbəri olaraq, təkcə regionda deyil, bütün dünyada, o cümlədən Yaxın Şərqdə ciddi nüfuza və əlaqələrə sahib olub. Bu amil onun prezidentliyə namizədliyinin mümkünlüyü barədə müəyyən təsəvvür formalaşdırır".
Politoloq Prezident Rəcəb Tayyib Ərdoğanın Hakan Fidana dəstək verməsini və onu açıq siyasətə gətirməsini prezident Ərdoğanın gələcək dövrə hesablanmış, yəni hakimiyyətdən sonra da öz siyasi kursunu davam etdirmək məqsədinə yönəlmiş bir addım kimi qiymətləndirir: "Əgər bu baş verərsə, düşünürəm ki, kifayət qədər uğurlu bir addım olacaq. Daha əvvəl qeyd etdiyim kimi, Hakan Fidanın indiyədək əldə etdiyi uğurlar, həmçinin diplomat kimi göstərdiyi effektiv fəaliyyət, istər Türkiyə cəmiyyətində, istərsə də dost ölkələrdə müsbət qarşılanır. Bu səbəbdən düşünürəm ki, Ərdoğanın hakim partiyada alternativləri də mövcuddur. Ən azı, Ədalət və İnkişaf Partiyasında Hakan Fidanın perspektivli namizəd kimi ön plana çıxdığını söyləmək mümkündür. Beləliklə, hesab edirəm ki, yeni konstitusiyanın qəbulundan sonra Hakan Fidanın prezidentliyə namizədliyi ilə bağlı mənzərə aydınlaşacaq".
Pərvin Hacıyeva
19:06 22.05.2025
Oxunuş sayı: 15760
