Avropada 7 sərnişin təyyarəsinə bomba xəbərdarlığı edilib
Avropada uçuş həyata keçirən yeddi sərnişin təyyarəsinə göyərtələrində partlayıcı qurğuların olduğu barədə məlumat daxil olub. Aparılan yoxlamalar zamanı təyyarələrin heç birində bomba aşkarlanmayıb.
Crossmedia.az xəbər verir ki, bu barədə “BBC” məlumat yayıb.
Məlumata görə, hadisə ilə əlaqədar təyyarələrdən birinin ekipajı marşrutu dəyişmək qərarına gəlib. Londonun Hitrou hava limanından havaya qalxan LOT aviaşirkətinə məxsus “Boeing 737 MAX” təyyarəsi Varşavadakı Frederik Şopen hava limanı əvəzinə Modlin hava limanına eniş edib.
Digər altı təyyarə isə təyinat hava limanlarına enib. Sonradan aparılan yoxlamalar zamanı onların heç birində partlayıcı qurğu tapılmayıb.
Bomba xəbərdarlığı alan təyyarələr Kopenhagen–Varşava, Berqamo–Sofiya, Dublin–Sofiya, Mançester–Mursiya, Lissabon–Roma və Dublin–Roma marşrutları üzrə uçuşlar həyata keçirib.
“BBC” təyyarələr arasında hər hansı əlaqə müəyyən etməyib. Avropa ölkələrinin hakimiyyət orqanları hadisənin hava məkanının fəaliyyətini pozmağa yönəlmiş koordinasiyalı hücum olub-olmadığını aydınlaşdırmaq üçün birgə araşdırma aparacaq.
21:43 03.11.2026
Oxunuş sayı: 61
