Ukraynanın müharibədən sonrakı taleyi Brüsseldə müzakirə olunacaq
Noyabrın 4-də Brüsseldə Ukraynanın müharibədən sonrakı bərpası, iqtisadi inkişafı və uzunmüddətli təhlükəsizliyi ilə bağlı beynəlxalq görüş keçiriləcək.
Crossmedia.az xəbər verir ki, “Reuters” agentliyi Avropa Komissiyasının sözçüsü Paula Pinyonun açıqlamasına istinadən bu barədə məlumat yayıb.
Görüşdə Ukrayna, ABŞ, Fransa, Almaniya, Böyük Britaniya, NATO və Dünya Bankının nümayəndələri iştirak edəcəklər.
Paula Pinyo bildirib ki, danışıqlar daha əvvəl Mayamidə keçirilmiş məsləhətləşmələrin davamı olacaq.
Tərəflər Ukraynanın müharibədən sonrakı bərpasını, iqtisadi inkişaf perspektivlərini, təhlükəsizlik təminatlarını və davamlı sülhün əldə olunması istiqamətində atılacaq addımları müzakirə edəcəklər.
Avropa Komissiyasının sözçüsü ABŞ-ni görüşdə konkret kimin təmsil edəcəyini hələlik açıqlamayıb.
O, həmçinin Ukrayna Prezidenti Volodimir Zelenskinin bu həftə Brüsselə mümkün səfəri barədə məlumatının olmadığını bildirib.
Qeyd edək ki, ABŞ-nin vasitəçiliyi ilə noyabrın 10–11-də Əbu-Dabidə Rusiya və Ukrayna nümayəndələrinin iştirakı ilə üçtərəfli danışıqların keçirilməsi də planlaşdırılır.
17:50 03.11.2026
Oxunuş sayı: 58
