Lavrov “3+3” formatında yeni görüşün keçiriləcəyini açıqlayıb
Cənubi Qafqaz üzrə “3+3” regional əməkdaşlıq platformasının növbəti iclasının yaxın vaxtlarda keçirilməsi gözlənilir.
Crossmedia.az xəbər verir ki, Rusiyanın xarici işlər naziri Sergey Lavrov bu barədə IV Minsk Beynəlxalq Avrasiya Təhlükəsizliyi Konfransında çıxışı zamanı bildirib.
Lavrov qeyd edib ki, Azərbaycan, Ermənistan, Gürcüstan, Rusiya, Türkiyə və İranı əhatə edən “3+3” formatı regional əməkdaşlığın inkişafı baxımından perspektivli platformadır.
“Bu platformanın iştirakçıları birləşdirici gündəliyin irəli aparılması barədə razılığa gəliblər. Ümid edirik ki, yaxın vaxtlarda bu formatda növbəti görüş keçiriləcək”, – deyə Rusiya XİN rəhbəri vurğulayıb.
Lavrov daha əvvəl növbəti xarici işlər nazirləri görüşünün Azərbaycanda, ondan sonrakı toplantının isə Ermənistanda keçirilməsini məqsədəuyğun hesab etdiyini bildirmişdi.
Qeyd edək ki, “3+3” platforması Cənubi Qafqazın üç ölkəsi və onların üç qonşusu arasında regional məsələlərin müzakirəsini nəzərdə tutur. Gürcüstan indiyədək bu format çərçivəsində keçirilən görüşlərdə iştirak etməyib.
17:38 03.11.2026
Oxunuş sayı: 58
