Vatikan Ukrayna ilə bağlı görüşlər üçün meydança təqdim edir, amma prosesi İtaliya idarə edir
Vatikan Ukrayna ilə bağlı danışıqlar üçün görüş məkanı təklif etsə də, birbaşa təşkilatçı və ya iştirakçı qismində çıxış etmir.
Crossmedia.az xəbər verir ki, bu barədə İtaliyanın La Repubblica qəzeti yazır.
Məlumata görə, danışıqlar prosesinin əsas koordinasiyasını İtaliyanın baş naziri Corca Meloni həyata keçirir. O, həm Avropa liderləri, həm də ABŞ tərəfi ilə telefon danışıqları aparır.
Qeyd edək ki, Meloninin məqsədi həftə sonuna qədər ilk raundun tarixlərini müəyyənləşdirməkdir. İlkin mərhələdə texniki formatda görüşlərin keçirilməsi planlaşdırılır. Daha sonra isə bu format xarici işlər nazirləri səviyyəsində görüşlərə və sonda Rusiya-Ukrayna sammitinə zəmin yaradacaq.
Meloni yaxın günlərdə Fransa Prezidenti Emmanuel Makron, Avropa İttifaqı rəhbərliyi, Türkiyə və digər tərəfdaşlarla məsləhətləşmələr aparmağı planlaşdırır. ABŞ Prezidenti Donald Trampla da növbəti telefon danışığının baş tutacağı gözlənilir. Daha sonra Vatikan da proses barədə məlumatlandırılacaq.
Bildirək ki, əgər Tramp görüşün Vatikanda keçirilməsi ideyasına müsbət yanaşırsa, Makron bu məqsədlə İsveçrənin seçilməsini istəyir. Almaniya müxalifət lideri Fridrix Mersin ofisi isə "tarixlər və formatlar barədə danışmaq üçün hələ tez olduğunu" bildirir. Danışıqlar prosesində əsas naməlum tərəf isə Moskva qalır. Çünki Rusiya tərəfi hələlik heç bir konkret təklif almadığını bildirib.
Rusiya Prezidentinin mətbuat katibi Dmitri Peskov da bu məsələyə münasibət bildirərək qeyd edib ki, Ukrayna ilə bağlı növbəti görüşlər üzrə hələlik heç bir razılaşma mövcud deyil.
Xumar Emilqızı
17:40 22.05.2025
Oxunuş sayı: 491
