“Tarixi irəliləyiş”- Hindistan maoist üsyanını bitirməkdə qərarlıdır
Hindistanın mərkəzi vilayətlərində solçu maoist üsyançılara qarşı keçirilən hərbi əməliyyat nəticəsində azı 27 nəfər öldürülüb.
Crossmedia.az xəbər verir ki, bu barədə Çhattisqarh əyalətinin polis rəisi Prabhat Kumar məlumat verib.
Polis rəsmisinin sözlərinə görə, çərşənbə günü keçirilən əməliyyatda “bir neçə yüksək səviyyəli maoist lider” ya öldürülüb, ya da ağır yaralanıb. Yerli mediada yayılan məlumatlara görə, öldürülənlər arasında üsyançıların əsas liderlərindən biri hesab edilən və “Basavaraju” ləqəbi ilə tanınan Nambala Keshav Rao da olub.
Ötən həftə də Çhattisqarh ilə qonşu bir əyalət arasındakı dağlıq bölgədə baş vermiş digər silahlı toqquşma zamanı hökumət qüvvələri 31 üsyançını zərərsizləşdirmişdi. Hindistanın daxili işlər naziri Amit Şah həmin əməliyyatı “tarixi irəliləyiş” adlandırmışdı.
Nazir bildirib ki, Maoist üsyanına qarşı mübarizə çərçivəsində gələn ilin mart ayına qədər bu silahlı hərəkatın tamamilə məhv edilməsi planlaşdırılır. Maoist üsyanı Hindistanda artıq 50 ildən çoxdur davam edir və əsasən kənd ərazilərində fəaliyyət göstərən silahlı solçu qrupların hakimiyyətə qarşı çıxışı kimi tanınır.
Mədinə Cəlilova
15:22 22.05.2025
Oxunuş sayı: 8868
